स्कोडा स्लाभियाको रेकर्ड सेल, कुशाकको राम्रो प्रतिक्रिया, इलेक्ट्रिक समेत छिट्टै उपलब्ध हुने

भारतीय बजारमा स्कोडा स्लाभियाले निकै नै राम्रो प्रतिक्रिया पाएको छ । कम्पनीका अनुसार आगामी तीन महिनाका लागि स्लाभिया पूर्ण रूपमा बुक भइसकेको छ । अन्य कम्पनीका कारको बुकिङ रद्द गर्ने दर दोहोरो अंकमा हुने गरेको सन्दर्भमा स्लाभियाको बुकिङ रद्द गर्ने दर २ प्रतिशतभन्दा कम छ ।

हाल स्कोडा अटो इन्डियाको बिक्री ५ गुणाले बढेको छ । स्कोडाले गत वर्षको मार्चमा ११५९ युनिट र यो वर्षको मार्च महिनामा ५ हजार ६०८ युनिट कार बिक्री गरेको थियो । स्कोडाले जनवरीदेखि हालसम्म १३ हजार १२० युनिट बिक्री गरिसकेको छ ।

कम्पनीका अनुसार एक महिनाभन्दा कम अवधिमा स्लाभियाका १० हजारभन्दा बढी युनिट बुकिङ भइसकेको छ । जसका कारण पछिल्लो महिनामा सवारी साधनको बिक्रीमा उल्लेख्य उछाल आएको छ । स्लाभियाको लोकप्रियताका कारणले गर्दा मिड साइज सेडान सेगमेन्टमा प्रतिस्पर्धा झनै कठिन हुँदै गइरहेको छ । सो सेगमेन्टमा होन्डा सिटी अग्रस्थानमा रहेको छ र त्यसपछि हुन्डाई भर्ना र मारुती सियाज रहेको छ ।

स्कोडाको मिड साइजको एसयूभी स्कोडा कुशाकले पनि ग्राहकहरुबाट राम्रो प्रतिक्रिया पाइरहेको छ । कम्पनीले स्लाभिया र कुशाक मिलेर भारतमा नयाँ बिक्री रेकर्ड कायम गर्ने अपेक्षा गरेको छ ।

स्कोडाले आफ्नो इन्डिया २.० अन्तर्गत २ नयाँ मोडल ल्याएको छ जसको बुकिङ ४० हजार नाघेको छ । हालै स्कोडा ग्लोबलका सीईओ थोमस शेफरले कम्पनीले चाँडै नै भारतमा ४ मिटरभन्दा सानो एसयूभी लन्च गर्ने बताएका थिए । यसबाहेक कम्पनीले भारतमा इलेक्ट्रिक एसयूभी इन्याक समेत ल्याउने तयारी गरेको छ ।

स्कोडाले आफ्नो मिड साइज सेडान कार स्लाभियालाई मार्चमा १० लाख ६९ हजार भारुमा लन्च गरेको थियो । यसको टप भेरिएन्टको मूल्य १५ लाख ३९ हजार भारु राखिएको छ, जसमा अटोमेटिक ट्रान्समिसन र सनरुफ जस्ता फिचरहरू उपलब्ध छन् । स्लाभिया एमक्युबी प्लेटफर्ममा बनाइएको छ ।

स्वालिया हाल १.०–लिटर टीएसआई इन्जिनमा पेश गरिएको छ । जुन एक्टिभ र एम्बिशन मोडेल गरी २ इन्जिनमा उपलब्ध छ । यसको टप मोडलमा १.५ लिटर परफर्मेन्स पेट्रोल इन्जिन हुनेछ । यसको १.० लिटर इन्जिनले ११३ बीएचपीको पावर र १७५ एनएमको टर्क जेनेरेट गर्नेछ, जबकि १.५ लिटर इन्जिनले १४८ बीएचपी पावर र २५० एनएम टर्क जेनेरेट गर्नेछ ।

नेपाली बजारमा समेत स्कोडा स्लाभिया ल्याउने तयारी भइरहेको कम्पनीले बताएको छ । नेपाली बजारमा समेत यो गाडीको प्रतीक्षा भइरहेको छ भने स्कोडा कुशाकले पहिले देखि नै राम्रो प्रतिक्रिया पाइरहेको छ ।