बेस भेरिएन्टमा हुन्डाई क्रेटा र स्कोडा कुशाक मध्ये कुन उत्तम, यस्तो हुन सक्छ सम्भावना

एसयूभी सेग्मेन्टमा मार्केट लिडर हुन्डाई क्रेटालाई पछिल्लो समय भित्रिएका नयाँ एसयूभीले चुनौती थप्दै गएका छन् । युरोपियन ब्रान्ड स्कोडाले समेत क्रेटालाई टक्कर दिने अनुमान लगाउन सकिन्छ ।

यी दुई ब्रान्डबीच बेस भेरिएन्टमा कडा प्रतिस्पर्धा हुने देखिएको छ । मूल्य, फिचर्स र पावर तथा पर्फमेन्सलाई आधार मान्दा यो भेरिएन्टमा यी दुई ब्रान्डबीच कडा प्रतिस्पर्धा हुने देखिएको हो ।

बेस भेरिएन्टमा क्रेटा डिजेल र पेट्रोल दुबै इन्जिनमा उपलब्ध छ भने स्कोडा कुशाक भने पेट्रोल इन्जिनमा मात्र उपलव्ध छ । यो भेरिएन्टमा क्रेटाको ई लोडेड र एस मोडल डिजेल इन्जिन र एस पेट्रोल इन्जिनमा उपलब्ध रहदै आएको छ । त्यसैगरी कुशाकको भने सुरुवाती भेरिएन्ट एक्टिभ मोडल उपलब्ध हुनेछ ।

मूल्य र फिचर्स
बेस भेरिएन्टमा यी दुबै ब्रान्डका एसयूभीमा उपलब्ध प्रायः फिचर्स समान प्रकारको छ । क्रेटामा प्रोजेक्टर हेडल्याम्प, एलईडी पोजिसन ल्याम्प, रियर स्पोइलर, एसी, फलो–मि हेडल्याम्प, फ्रन्ट आर्मरेस्ट, रियर एसी भेन्ट, पावर विन्डो र हाइट एड्जस्टेवल ड्राइभर सिटजस्ता बेसिक फिचर्स उपलब्ध गराइएको छ । त्यसैगरी कुशाक एक्टिभमा एलईडी डीआरएल, हेलोजल हेडल्याम्प, एलइडी टेललाइट, फ्रन्ट सेन्टर आर्मरेस्ट, सात इन्चको इन्फोटेन्मेन्ट सिस्टम, एसी र पावरविन्डो उपलब्ध छ ।

हुन्डाई क्रेटामा १.५ लिटरको पेट्रोल र डिजेल इन्जिन दिइएको छ भने कुशाक एक्टिभमा १.० लिटरको टर्बोचार्ज्ड इन्जिन जडान गरिएको छ । जसमध्ये पेट्रोल इन्जिनको क्रेटाले ११३ बीएचपी पावर र १४४ एनएम टर्क जेनेरेट गर्छ भने सोही भेरिएन्टको डिजेल इन्जिनले ११३ एचपी पावर र २५० एनएम टर्क जेनेरेट गर्छ । उता कुशाक एक्टिभले ११५ बीएचपी पावरको साथै १७८ एनएम टर्क जेनेरेट गर्छ । यी दुबै गाडी ६ स्पिड म्यानुअल गियर बक्समा उपलब्ध छन् ।

माइलेजको कुरा गर्दा कुशाक एक्टिभले प्रलिलिटर इन्धन खपतमा १७.८८ किलोमिटर र क्रेटाको डिजेल इन्जिनले २१.४ किलोमिटर र पेट्रोल इन्जिनले १६.८ किलोमिटर माइलेज दिने दाबी गरिएको छ ।

पेट्रोल इन्जिनको क्रेटाको सबैभन्दा तल्लो भेरिएन्ट एसको मूल्य नेपाली बजारमा ५३ लाख ९६ हजार रुपैयाँ निर्धारण गरिएको छ भने डिजेल इन्जिनमा उपलब्ध क्रेटा ई लोडेडको मूल्य ४५ लाख ५६ हजार र एसको मूल्य ५६ लाख ९६ हजार रुपैयाँ तोकिएको छ ।  स्कोडा कुशाकको सुरुवाती भेरिएन्ट एक्टिभ म्यानुअल ट्रान्समिसनको मूल्य ४९ लाख ९० हजार रुपैयाँ तोकिएको छ ।

पावर, फिचर्स र सुबिधाका हिसावले एकै स्तरका एसयूभी भएपनि स्कोडा कुशाकको लागि कम्पनीले कस्तो सुविधा उपलब्ध गराउछ, त्यसले नै यी दुई एसयूभी बीचको बजार प्रतिस्पर्धालाई निर्धारण गर्नेछ ।

स्कोडा कुशाक ९५ प्रतिशत स्थानीयकरण गरेर बनाइएको एसयूभी हो जसका कारण यसको मूल्य नेपालमा प्रतिस्पर्धात्मक भएको र यसले नेपाली अटोमोबाइल क्षेत्रमा एउटा नयाँ प्रतिस्पर्धा भित्र्याउने अनुमान गरिएको छ ।