स्कोडा कुशाक फेसलिफ्टको टिजर सार्वजनिक, २० जनवरीमा लन्च हुँदै

स्कोडाले भारतीय बजारमा बिक्री गर्दै आएको लोकप्रिय मध्यम आकारको एसयूभी कुशाकको फेसलिफ्ट संस्करण चाँडै नै लन्च गर्ने तयारी गरेको छ । लन्च अघि कम्पनीले नयाँ टिजर सार्वजनिक गर्दै आगामी कुशाक फेसलिफ्टको भविष्यवादी डिजाइनको झलक दिएको छ।

कम्पनीले जारी गरेको टिजरमा नयाँ कुशाक फेसलिफ्टको अगाडि र पछाडिको भाग आंशिक रूपमा देख्न सकिन्छ। टिजर अनुसार यसमा नयाँ बाहिरी रङको प्रयोग गरिएको छ भने अगाडिको भागमा पुनः डिजाइन गरिएको हेडलाइट र कनेक्टेड एलईडी डीआरएल दिइनेछ । त्यस्तै, पछाडिको भागमा कनेक्टेड एलईडी टेललाइटको प्रयोग गरिने संकेत पनि टिजरबाट प्राप्त भएको छ।

रिपोर्टका अनुसार फेसलिफ्ट संस्करणमा हाल उपलब्ध १.५ लिटर इन्जिन नै प्रयोग गरिनेछ । सो इन्जिन ६ स्पिड म्यानुअल र अटोमेटिक ट्रान्समिसन विकल्पसहित उपलब्ध हुनेछ ।

नयाँ स्कोडा कुशाक फेसलिफ्टमा इन्फोटेनमेन्ट सिस्टम, नयाँ डिजिटल इन्स्ट्रयुमेन्ट क्लस्टर, नयाँ डिजाइनका अलोय ह्विल, प्यानोरामिक सनरुफ तथा लेभल २ एडास जस्ता आधुनिक सेफ्टी र फिचरहरू समावेश गरिन सक्ने अनुमान गरिएको छ।

स्कोडाले जनवरी २० मा भारतमा कुशाक फेसलिफ्ट आधिकारिक रूपमा लन्च गर्ने तयारी गरेको छ। मध्यम आकारको एसयूभी सेग्मेन्टमा स्कोडा कुशाकले मारुती ग्रान्ड भिटारा, फक्सवागन टाइगुन, हुन्डाई क्रेटा र किया सेल्टोसजस्ता लोकप्रिय मोडलसँग प्रतिस्पर्धा गर्नेछ ।