नोभेम्बर सम्म सेरेस ग्रुपले ग-यो २५५.२६ प्रतिशत बढी एनईभी बिक्री, नोभेम्बरमा ५४.५८ प्रतिशत बढी

चाइनिज कार निर्माता कम्पनी सेरेसले नोभेम्बर महिनाको सेल्स रिपोर्ट सार्वजनिक गरेको छ । यस अनुसार न्यु इनर्जी भेइकल (एनईभी) व्यापारमा कम्पनीले उल्लेखनिय उपलब्धि हासिल गरेको छ ।

गत महिना सेरेसले ३६ हजार ८४२ एनईभी डेलिभरी गरेको छ, जुन गत वर्षको यही महिनाको तुलनामा ५४.५८ प्रतिशत बढी हो । गत जनवरी देखि नोभेम्बर सम्म कम्पनीले समग्रमा ३ लाख ८९ हजार ५६६ युनिट एनईभी बिक्री गरेको छ, जुन गत वर्षको यही अवधिको तुलनामा २५५.२६ प्रतिशत बढी हो ।

सेरेस ग्रुप अन्तर्गतको एइटो ब्रान्डले यो वर्ष आफ्नो प्रोडक्ट लाइनअप विस्तार गरिरहेको छ । एइटो ब्रान्डका एम५, एम७ प्रो र एम९ ले यो वर्ष बजारबाट बलियो पहिचान कायम गरेका छन् र ग्राहकबाट राम्रो प्रतिक्रिया पाएका छन् ।

सन् २०२४ मा मात्र एइटो एम७ १ लाख ८० हजार युनिट डेलिभरी गरिएको छ । चाइनिज एनईभी स्टार्टअप मध्ये यो चीनको बेस्ट सेलिङ मोडल बनेको छ ।

त्यसैगरी एइटो एम९ चाहिं ५ लाख युआन अर्थात ६८ हजार ८७७ डलर भन्दा माथि मूल्यको सेगमेन्टमा मार्केट लिडर बनेको छ र ११ महिनामा १ लाख ८० हजार अर्डर हासिल गरेको छ ।

सेरेस र टेक्नोलोजी जायन्ट हुवावेद्वारा संयुक्त रुपमा डिजाइन गरिएको एइटो एम९ लाई हाई–एन्ड न्यु इनर्जी एसयूभी भनिएको छ । सन् २०२३ को डिसेम्बरमा सो इलेक्ट्रिक एसयूभी लन्च भएको थियो ।

नेपाली बजारमा समेत सेरेस ईभी बिक्रीका लागि उपलब्ध छ भने भविष्यमा एइटो ब्रान्ड समेत उपलब्ध हुने अनुमान गर्न सकिन्छ ।