सेल्फ ड्राइभिङ ट्रकले पार ग-यो १५२८ किमी दुरी, मानव ड्राइभर भन्दा १० घण्टा छिटो

फुल्ली अटोनोमस ट्रक तर्फको यात्रा चुनौतीपूर्ण भए पनि यो अब प्राप्त गर्न सकिने यात्रातिर बढेको छ । यद्यपि सेल्फ ड्राइभिङ कार भन्दा अटोनोमस ट्रक वास्तविकताको नजिक पुगेको छ ।

हालै अमेरिकाको एरिजोना देखि ओक्लाहोमा सम्म वाटरमेलोनको भारी बोकेको सेल्फ ड्राइभिङ ट्रकले यात्रा पुरा गरेको छ र यसले अटोनोमस ट्रकिङ टेक्नोलोजीको सम्भाव्यतालाई प्रदर्शन गरेको छ ।

तुसिम्पल नामक ट्रान्सपोर्टेसन कम्पनी, जसले ट्रकको ड्राइभरलेस टेक्नोलोजीमा विशेषज्ञता हासिल गरेको छ, ले यो उपलब्धी हासिल गर्न सफल भएको हो ।

यात्रा अवधिमा उक्त अटोनोमस ट्रकले ९५० माइल अर्थात १ हजार ५२८ किलोमिटरको यात्रा गरेको थियो । यसले दुरीको ८० प्रतिशत पुरा गरेको थियो भने त्यसपछिको यात्राका लागि मानव ड्राइभर प्रयोग गरिएको थियो । बीचमा केही समस्या आउन सक्ने सम्भावनाका लागि मानव ड्राइभरलाई तयार राखिएको थियो ।

यहाँ महत्वपूर्ण कुरा के छ भने सो दुरी ट्रकले १४ घण्टा ६ मिनेटमा पुरा गरेको थियो, जुन मानव ड्राइभरले चलाउने समय भन्दा करिव १० घण्टा कम हो । मानव ड्राइभरले बीचमा आराम र अन्य कार्य गर्नु पर्ने भएकाले समेत दुरी बढ्ने गरेको पाइन्छ ।