टीभीएस एक्स : लाइभ लोकेशन सेयरिङ फिचरसहित सबैभन्दा महँगो इलेक्ट्रिक स्कुटर लन्च

टीभीएस मोटरले नयाँ इलेक्ट्रिक स्कुटर टीभीएस एक्स लन्च गरेको छ । लाइभ लोकेशन सेयरिङ फिचरको साथमा आउने यो भारतको पहिलो इलेक्ट्रिक स्कुटर भएको कम्पनीको दाबी छ । यो कम्पनीको दोस्रो इलेक्ट्रिक स्कुटर हो ।

सो स्कुटर सबैभन्दा महँगो इलेक्ट्रिक स्कुटर हो । यसको मूल्य २ लाख ५० हजार भारु राखिएको छ । कम्पनीले यसको बुकिङ पनि खोलेको छ र नोभेम्बरको अन्त्यमा यसको डेलिभरी गरिनेछ ।

सो स्कुटर सिंगल च्यानल एबीएस र क्रुज कन्ट्रोल भएको भारतकै पहिलो इलेक्ट्रिक स्कुटर भएको कम्पनीको दाबी छ । ब्रेकिङका लागि टीभीएस एक्सको फ्रन्टमा सिंगल च्यानल एबीएस भएको २२० एमएमको डिस्क ब्रेक र पछाडि १९५ एमएमको सामान्य डिस्क ब्रेक छ ।

कम्पनीले सो इलेक्ट्रिक स्कुटर एक्सेलटन प्लेटफर्ममा विकास गरेको हो । यसलाई बनाउन आल्मुनियम फ्रेम प्रयोग गरिएको छ भने आरामदायी सवारीका लागि पछाडि मोनोसक सस्पेन्सन दिइएको छ । यसको सिटको उचाइ ७७० एमएम छ । यसको अगाडि भर्टिकल एलईडी हेडलाइट र एलईडी डीआरएलएस डिजाइन दिइएको छ ।

टीभीएस एक्समा परमानेन्ट म्याग्नेट सिन्क्रोनस एयर कुल्ड मोटर दिइएको छ, जसले ११ किलोवाटको पावर र ४० एनएमको टर्क जेनेरेट गर्छ । स्कुटरमा एक्सटेल्थ, एक्सट्राइड र एक्सोनिक गरी ३ वटा मोड उपलब्ध छ । स्कुटरले २.६ सेकेन्डमा ०–४० किलोमिटर प्रतिघण्टाको स्पिड हासिल गर्ने कम्पनीको दाबी छ । यसको उच्च गति १०५ किमी प्रतिघन्टा छ ।

पावरको लागि स्कुटरमा ४.४४ किलोवाटको ब्याट्री प्याक दिइएको छ । फुल चार्जमा सो स्कुटरले १४० किलोमिटर रेन्ज दिन्छ । चार्जिङको लागि यसमा ३००० वाटको स्मार्ट एक्स होम ¥यापिड चार्जरले ५० मिनेटमा ० देखि ५० प्रतिशत चार्ज गर्न सकिन्छ । ९५० वाट पोर्टेबल चार्जरले ४ घन्टा ३० मिनेटमा ८० प्रतिशतसम्म चार्ज गर्न सकिन्छ । साथै, यसमा चार्ज गर्नको लागि ३ किलोवाटको फास्ट चार्जर पनि उपलब्ध छ ।