धोविघाट आगालागीमा सत्यदिपको मुख्य गोदाम जलेर नष्ट, क्षतीको विवरण आउन बाँकी

हिजो राती धोविघाटमा भएको आगालागीमा सत्यदिपको मुख्य गोदाम जलेर नष्ट भएको छ । गोदाम नजिकै रहेको फर्निचरमा मध्यराती आगालागी भएको थियो । उक्त फर्निचरको आगो नियन्त्रण बाहिर जाँदा नजिकै रहेको स्पेयर पार्ट्स र लुब्रिकेन्ट्स गोदाम जलेर नष्ट भएको हो ।

आगालागीबाट करोडौँ मूल्य वरावरको सामान नष्ट भएको कम्पनीका प्रवन्ध निर्देशक दिपेन्द्र मिश्रले बताए । अहिले इन्सुरेन्स प्रतिनिधीको रोहवरमा क्षतिको विवरण संकलन भैरहेको र उक्त विवरण संकलन भएपछि मात्र वास्तविक क्षतिवारे केही भन्न सकिने उनको भनाई छ ।

स्पेयर पार्टस् व्यवसायमा स्थापित सत्यदिप इन्टरनेश्नलले आफ्नो कर्पोरेट अफिस अफिस नजिकै गोदाम समेत संचालन गर्दै आइरहेको छ । सो स्थानमा कम्पनीको अन्य धेरै गोदाम रहे पनि आगालागीबाट मूख्य गोदाममा असर परेको हो । सो गोदाममा दिव्योल लुब्रिकेन्ट्स सहित अन्य विभिन्न ब्रान्डका स्पेयर पार्ट्सहरुको स्टक रहेको थियो ।