मोटरसाइकल संस्कृतिमा नयाँ आयाम थप्न रोयल इनफिल्ड नेपाल र सन्दिप क्षेत्रीविच सहकार्य

काठमाडौं–रोयल इनफिल्डको नेपालका लागि आधिकारिक वितरक अल्फा अटोमोटिभ प्रालिले हास्यब्यङ्ग्य कलाकार एबं सामाजिक व्यक्तित्व तथा उत्प्रेरक सन्दीप क्षेत्रीलार्ई ‘फेस अफ रोयलइनफिल्ड’ नियुक्त गरेको छ ।

सन्दीप क्षेत्री विगत दुई दशकदेखि नेपाली कला, मनोरञ्जन र सामाजिक क्षेत्रका माध्यमबाट जनमानसको मन जित्न सफल एक सशक्त व्यक्तित्व हुन् । उनको जीवनशैली, दृष्टिकोण र कार्यशैलीले स्वतन्त्रता, साहसिकता तथा आत्मविश्वास जस्ता गुणहरू अभिव्यक्त गर्छन ।

उनको सादगीपूर्ण व्यक्तित्व, व्यापक लोकप्रियता तथा मोटरसाइकलप्रतिको गहिरो रुचिले उनलाई यस महत्वपूर्ण भूमिकाको लागि उपयुक्त बनाएको कम्पनीले जनाएको छ ।

रोयल इनफिल्ड नेपालले यस सहकार्यलाई केवल व्यवसायिक साझेदारीको रूपमा नभई, एक साझा मूल्य र दृष्टिकोणमा आधारित यात्राको प्रारम्भको रूपमा हेरेको बताएको छ, जसले नेपाली मोटरसाइकल संस्कृतिमा नवीन आयाम थप्ने विश्वास लिएको छ ।

यस प्रयासबाट रोयल इनफिल्डमार्फत आन्तरिक पर्यटन प्रवद्र्धन, सडक सुरक्षा, ट्राफिक नियम पालना सहितको सन्देश एवं कर्तव्य पालना गरिने विश्वास लिइएको छ । साथै यस सहकार्यबाट समाजका हरेक वर्ग र समूदायसम्म पुग्न तथा युवा पुस्तामाझ अझ प्रगाढ सम्बन्ध गास्न सकिने कम्पनीको अपेक्षा छ ।

मोटरसाइकललाई केवल यातायातको साधन मात्र नभई आत्म–अभिव्यक्तिको माध्यमको रूपमा प्रस्तुत गर्ने दृष्टिकोण यस सहकार्यद्वारा अझ स्पष्ट र सशक्त रूपमा उजागर हुने कम्पनीले जनाएको छ ।