स्टक क्लियरेन्स गर्दै रनर, नयाँ लट २ महिनापछि आउने

बंगलादेशबाट आयात हुने रनर मोटरसाइकलको नयाँ लट दुई महिनापछि भित्रिने भएको छ । कम्पनीले बीएस६ प्रविधि सहित बोल्ट र अन्य मोडल नेपाली बजारमा उपलब्ध गराउने बताएको छ ।

नयाँ लट आउने मिति नजिकिएसँगै नेपालस्थित आधिकारिक वितरक रमन मोटर्सले अहिले भारी छुटका साथ पुराना मोटरसाइकलको स्टक क्लियरेन्स गरिरहेको छ । एउटै मोडलमा ६५ हजारसम्म छुट दिएर पुरानो स्टक सल्टाउन खोजिएको कम्पनी स्रोतले बताएको छ । कम्पनीसँग हाल २०१९ र २०२० मोडलका केही युनिट बाइक उपलब्ध छ ।

नेपाली बजारमा उपलब्ध विभिन्न मोडल मध्ये नाइट राइडरको मूल्य २ लाख ६० हजार रहेकोमा यसको मूल्य २ लाख २९ हजार, बुलेटको मूल्य १ लाख ९५ हजार बाट १ लाख ५९ हजार, टर्बोको मूल्य २ लाख ४० हजारबाट २ लाख ५ हजार, रोयल प्लसको मूल्य १ लाख ८९ हजारबाट १ लाख ४९ हजार, चिताको मूल्य १ लाख ६९ हजारबाट १ लाख २९ हजार र एडी–८०एसको मूल्य १ लाख ६५ हजारबाट १ लाख रुपैयाँ कायम गरिएको थियो । फेस्टिभल अफरको रुपमा राखिएको यो छुट मंसिर मसान्तमा सकिएको भए पनि अझै पनि यी मोडलमा केही छुट हुने अनुमान गर्न सकिन्छ ।

नेपाली बजारमा सबैभन्दा लोकप्रिय रहेको एड्भेन्चर मोडल रनर हकको मूल्य ४ लाख २५ हजारबाट घटाएर ३ लाख ६९ हजारमा बिक्री गरिएको थियो । यसको स्टक भने सकिएको कम्पनीको भनाइ छ । यसमा एकै पटक ५१ हजार मूल्य घटाइएको थियो भने सबैभन्दा बढी एडी–८०एसमा ६५ हजार मूल्य कम गरिएको थियो ।

५ बर्षअघि नेपाल भित्रिएको रनरले ९० सीसी देखि २०० सीसीसम्मका मोटरसाइकलको बिक्री गर्दै आइरहेको थियो । जसमध्ये २०० सीसी क्षमताको डर्ट बाइक हक निकै नै लोकप्रिय बनेको थियो । ३ लाख ६९ हजार रुपैयाँमा बिक्री गर्दै आइरहेको यो बाइकमा अहिले पनि ग्राहकले रुचि राख्दै आएपनि नयाँ मोडल उपलब्ध नभएका कारण बिक्री गर्न नसकिएको स्रोतको भनाइ छ । ‘हामीले २ महिनाभित्र रनरको नयाँ मोडल आयात गर्ने गरी तयारी थालेका छौ । जसका लागि स्पेयर पार्ट्सको स्टक समेत थप गरेका छौ । बंगलादेशबाट कम्पनीका प्रतिनिधिहरु नेपाल आएर अध्ययन समेत गरिसक्नु भएको छ’स्रोतले नेपाल अटोलाई बताएको छ ।

इन्जिनमा ७ बर्षसम्मको वारेन्टी सेवा दिएर कारोबार थालेको यो ब्रान्डले नेपाली बजारमा राम्रो प्रभाव पार्ने अपेक्षा गरिएको थियो । अन्य कम्पनीले थ्रीएस अर्थात सेल्स, सर्भिस र स्पेयर पार्ट्सको उपलब्धता सहित बाइक बिक्री गरिरहेको अवस्थामा रनरले भने फोरएस अर्थात सेल्स, सर्भिस, स्पेयर पार्ट्स र सेफ्टी राइडिङ समेत उपलब्ध गराएको दाबी गरेको थियो ।

भारतीय टु ह्विलरको तुलनामा केही सस्तो देखिएपनि पावर र पर्फमेन्सको साथै लुक्स र डिजाइनमा समेत खासै नयाँपन दिन नसकेका कारण यो ब्रान्डलाई नेपालमा खासै रुचाइएन । तर आगामी दिनमा ल्याउने नयाँ मोडल र प्रविधिले भने ग्राहकमा केही सकारात्मक प्रभाव पार्ने अपेक्षा गर्न सकिन्छ ।