७५० सीसी इन्जिन सहितको कन्टिनेन्टल जीटी-आर बाइक ल्याउँदै रोयल इनफिल्ड

रोयल इनफिल्डले नयाँ ७५० सीसी इन्जिनसहितको नयाँ बाइक लन्च गर्ने तयारीमा जुटिरहेको छ। सो नयाँ मोडेल रोयल इन्फिल्ड कन्टिनेन्टल जीटी-आर हुनेछ। नयाँ कन्टिनेन्टल जीटी-आर मा विशेष रूपले डिजाइन गरिएको पूर्ण क्याफे रेसर शैली अपनाइएको छ ।

हालसम्म कम्पनीले औपचारिक रूपमा नयाँ ७५० सीसी इन्जिनको विस्तृत विवरण वा यसको पावर आउटपुटका बारेमा कुनै जानकारी सार्वजनिक गरेको छैन । यद्यपि रिपोर्टका अनुसार ठुलो क्षमताको इन्जिन भएकोले यो हाल उपलब्ध ६५० सीसी ट्विन इन्जिनहरूभन्दा उच्च प्रदर्शन दिने अपेक्षा गरिएको छ।

नयाँ ७५० सीसी कन्टिनेन्टल जीटी-आर भारतीय सडकमा पटक–पटक परीक्षणको क्रममा देखिएको छ । परीक्षण मोडेलमा ठुला इन्जिन र आधुनिक क्याफे रेसर डिजाइनको संयोजन स्पष्ट देखिएको छ । नयाँ बाइकको बनावट हालको जीटी ६५० मोडलभन्दा केही भारी हुने अनुमान गरिएको छ । साथै यसले तिव्र गति र उत्कृष्ट एक्सेलेरेसन क्षमताको समेत संकेत गरेको छ ।

रोयल इनफिल्डले अहिलेसम्म नयाँ कन्टिनेन्टल जीटी-आरको लन्च मिति सार्वजनिक गरेको छैन। तर रिपोर्टका अनुसार सो बाइक सन् २०२६ भित्र डेब्यु गर्ने अपेक्षा गरिएको छ ।