रोयल इन्फिल्डको डकार र्‍याली रेसिङ बाइकमा आधारित ८५० सीसीको एड्भेन्चर बाइक सार्वजनिक

रोयल इन्फिल्डले बेलायतको गुडवुड फेस्टिवल अफ स्पिडमा ८५० सीसी एड्भेन्चर बाइक सार्वजनिक गरेको छ । सो बाइक ६५० सीसी प्लेटफर्ममा आधारित छ । रोयल इन्फिल्ड एड्भेन्चर बाइकको साथमा मिडिलवेट सेगमेन्टमा प्रवेश गर्न सक्ने अनुमान पनि गरिएको छ ।

रोयल इन्फिल्डले डेथ स्प्रे कस्टमका डेभिड ग्वाइथरसँग सहकार्य गरेर र्‍याली बाइक बनाएको हो । यसलाई सन् १९८० र १९९० को दशकको डकार र्‍याली रेसिङ बाइकबाट प्रेरित भएर बनाएको हो । डेथ स्प्रे कस्टमको प्रेरणा सन् १९८८ देखि १९९१ सम्म यामाहा टेनेर र होन्डा अफ्रिका ट्विन रेसिङ मेसिनबाट लिइएको हो । सो बाइकका निर्माता डेभिड ग्वाइथरका अनुसार उनको उद्देश्य त्यतिबेलाको पावर फिगर र स्टाइलको आधुनिक र्‍याली बाइक विकास गर्ने थियो ।

रोयल इन्फिल्डको ८५० सीसी एड्भेन्चर बाइक हल्का पेस्टल पिंक र पर्पल रङमा पेश गरिएको हो । यसमा डुकाटी डेजर्ट एक्स जस्तै रेट्रो डिजाइन थिम दिइएको छ । सो बाइकको अगाडि एनालग स्टाइल म्याप बुक र बडी प्यानलका लागि पिरियड-करेक्ट ग्राफिक्स दिइएको छ । साथै यसमा ह्यारिस पर्फमेन्सबाट ट्विक गरिएको च्यासिस, एड्जस्टेबल ओहलिन्स सस्पेन्सन र कस्टम स्विङआर्म र एक्जस्ट सिस्टम पनि दिइएको छ ।

सो बाइक नेपालमा भने तत्काल लन्च हुने सम्भावना छैन । रोयल इन्फिल्डको ८५० सीसी बाइकमा धेरै उत्कृष्ट फिचर समावेश गरिएको छ ।