रोयल इन्फिल्डका मोटरसाइकल नेपालमै एसेम्वल हुने, वार्षिक ८ हजार युनिट उत्पादन गर्ने लक्ष्य

रोयल इन्फिल्ड मोटरसाइकलको नेपालका लागि आधिकारिक वितरक त्रिवेणी समुहले स्वदेशमै एसेम्वल प्लान्ट स्थापना गरी मोटरसाइकल उत्पादन गर्ने भएको छ । जसका लागी उसले उद्योग दर्ता समेत गराइसकेको छ । उद्योग विभागका अनुसार मोटरसाइकल एसेम्बलका लागि टीजी अटो ग्रुप प्रालि उद्योग विभागमा दर्ता भएको हो । गत चैत्र महिनादेखी सो समुह अन्तर्गतको अल्फा अटोमोटिभ्स प्रालिले यी मोटरसाइकल आयत गरी कारोबार गर्दै आइरहेको छ ।

मोटरसाइकल एसेम्बल गर्न समूहले टीजी अटो ग्रुप मार्फत उद्योगमा ३८ करोड रुपैयाँ लगानी गर्ने प्रस्ताव गरेको छ । उद्योग बाराको जितपुर उपमहानगरपालिका वडा नम्बर ९ मा स्थापन हुने जनाइएको छ । यो नयाँ उद्योगले वार्षिक ८ हजार मोटरसाइकल एसेम्बल गर्ने लक्ष्य लिएको छ ।

नयाँ वितरकका रुपमा कारोबार थाले लगत्तै कर बृद्धिको मारमा परेको यो मोटरसाइकलको मूल्य त्यसयता भारी मात्राले बृद्धि भएको छ भने विगत ४ महिनायता आयत प्रतिवन्धको समस्या समेत झेल्नु परेको छ । नेपाली बजारमा यो ब्रान्डको वार्षिक ७ हजार युनिटसम्म मोटरसाइकल बिक्री हुने गरेको तथ्यांक छ ।

मूल्य बृद्धि र आयत प्रतिवन्धका कारण कारोबार गर्न कठिन भएपछि कम्पनीले नेपालमै एसेम्वल युनिट स्थापना गर्न लागेको सहजै अनुमान लगाउन सकिन्छ । हाल सरकारले एसेम्वलका लागी आवश्यक किट आयत गर्न कुनै रोकावट गरेको छैन भने यस्ता किट ल्याएर स्वदेशमै एसेम्वल गर्दा आयतमा छुटदेखी अन्य सहुलित समेत प्रदान गर्दै आइरहेको छ ।

हाल नेपालमा बजाज र टिभिएसले आफ्नै एसेम्वल प्लान्टमार्फत मोटरसाइकल उत्पादन गरिरहेका छन् भने यामाहा, सुजुकी, भेष्पा र अप्रिलिया लगायत ब्रान्डले उद्योग दर्ता गरिसकेका छन् । वाँकी ब्रान्डले समेत उद्योग दर्ता गर्ने तयारी थालेका छन् ।