रोयल इन्फिल्डले एक वर्षमा नेपालमा बेच्यो करिव १२ हजार मोटरसाइकल, सेगमेन्ट लिडरको फाइदा लिदै

काठमाडौं - नेपालका लागि रोयल इन्फिल्डको आधिकारिक वितरक अल्फा अटोमोटिभले एक वर्षमा करिव १२ हजार मोटरसाइकल बिक्री गरेको छ । कम्पनीले सन् २०२४ अप्रिल १ देखि २०२५ मार्च ३१ सम्म मानिने आर्थिक वर्ष २०२५ मा ११ हजार ८८३ मोटरसाइकल बिक्री गरेको छ । यो गत वर्ष भन्दा धेरै हो । सन् २०२४ को आर्थिक वर्षमा कम्पनीले नेपालमा १० हजार ८५ मोटरसाइकल बिक्री गरेको थियो ।

कम्पनीले यस अनुसार एकै वर्षमा करिव पौने ४ अर्ब रुपैयाँको व्यापार गरेको छ । कम्पनीले गत आर्थिक वर्षमा ३ अर्ब ७४ करोड ४० लाख रुपैयाँ (अपरिष्कृत)को व्यापार गरेको हो। कम्पनीले सन् २०२४ मा २ अर्ब ९२ करोड १० लाख रुपैयाँ र सन् २०२३ मा १८ करोड ९० लाख रुपैयाँको व्यापार गरेको थियो ।

कम्पनीले गत आव अर्थात २०२५ मा १७ करोड २० लाख रुपैयाँ खुद नाफा र १९ करोड ७० लाख रुपैयाँ क्यास नाफा गरेको उल्लेख छ । सन् २०२४ मा खुद नाफा लेभल १४ करोड ७० लाख रुपैयाँ र क्यास नाफा १५ करोड ४० लाख रुपैयाँ रहेको उल्लेख गरेको छ ।

कम्पनीले सन् २०२३ को मेबाट व्यवसायिक कारोबार सुरु गरेको थियो । स्थापना भएको ३ वर्षमा नै कम्पनीले उच्च व्यापार गरेको पाइएको छ । सरकारले स्वदेशमा नै सवारी साधन उत्पादनका लागि प्रोत्साहन गरेसँगै धेरै कम्पनीहरुले एसेम्बल प्लान्टमा लगानी गरेका छन् । रोयल इन्फिल्डले पनि नेपालमै एसेम्बल प्लान्टमार्फत रोयल इन्फिल्डका मोटरसाइकल उत्पादन गरिरहेको छ ।

नेपालमा हाल त्रिवेणी ग्रुप अन्तर्गतको कम्पनी अल्फा अटोमोटिभले नेपालमै रोयल इन्फिल्डका मोटरसाइकल एसेम्बल गरी बिक्रीवितरण गरिरहेको छ ।

नेपाल सरकारले प्रदान गर्ने सहुलियतको सदुपयोग गर्दै सीकेडी अर्थात कम्प्लेट्ली नक्ड डाउन कम्पोनेन्टबाट नेपालमै रोयल इन्फिल्डका मोटरसाइकल उत्पादन हुन्छन् । सरकारले यसरी नेपाल भित्र्याउने कम्पोनेन्टका लागि अन्तःशुल्कमा ५० प्रतिशत र भन्सार शुल्कमा २५ प्रतिशत शुल्क छुट दिदै आएको छ । यसबाट नेपालमै रोजगारी समेत सिर्जना भएको छ भने ग्राहकले पनि केही कम मूल्यमै मोटरसाइकल पाउन सम्भव भएको छ ।

विरेन्द्र कुमार संघाईको नेतृत्वमा रहेको त्रिवेणी ग्रुपमा तीन जनाको बोर्ड अफ डाइरेक्टर्स छ । बारा जिल्लामा रहेको अत्याधुनिक एसेम्बली युनिट १० हजार वर्ग फिट क्षेत्रफलमा फैलिएको छ । एसेम्बली प्लान्टबाट वार्षिक रुपमा २० हजार मोटरसाइकल उत्पादन गर्न सकिन्छ ।

नेपाल विभिन्न सेगमेन्टका मोटरसाइकलको बजार मानिन्छ । अन्य मोटरसाइकलमा तीव्र प्रतिस्पर्धा भए पनि रोयल इन्फिल्डका प्रतिस्पर्धी भने खासै बलिया देखिएका छैनन् । विशेष गरी २५० सीसी वा सो भन्दा कम क्षमताका मोटरसाइकलमा धेरै प्रतिस्पर्धा छ । रोयल इन्फिल्डले ३५० सीसी वा सो भन्दा माथिल्लो सेगमेन्टका मोटरसाइकल उत्पादन गर्दै आएको छ । यसकारण पनि यो सेगमेन्टका प्रतिस्पर्धी नेपाली बजारमा कम मात्र देखिएका छन् । यसको प्रत्यक्ष फाइदा रोयल इन्फिल्डलाई पुगेको छ ।