७५० सिसीको बबर मोटरसाइकल ल्याउँदै रोयल इन्फिल्ड

विश्वको सवैभन्दा ठूलो मिडसाइज मोटरसाइकल उत्पादक रोयल इन्फिल्डले ७५० सीसीको नयाँ मोटरसाइकल ल्याउने भएको छ । दुई वर्षपछि बजारमा आउने अनुमान गरिएको सो नयाँ मोटरसाइकल बबर सेग्मेन्टको हुने आँकलन गरिएको छ ।

आर२जी कोडनेम दिएर विकास भइरहेको सो नयाँ मोटरसाइकलका वारेमा कम्पनीले अहिले भारत, नर्थ अमेरीका, यूरोप र वेलायतबाट प्रतिक्रिया लिइरहेको छ । रोयल इन्फिल्डको प्रोडक्ट पोर्टफोलियोमा सवैभन्दा ठूलो इन्जिन जडान भएर आउन लागेको सो नयाँ मोटरसाइकलको विकास वेलायतको लेसिस्टरस्थित टेक सेन्टरमा भइरहेको जनाइएको छ । निकट भविष्यमा कम्पनीले यसको इभी अवतार समेत ल्याउन सक्ने आँकलन गरिएको छ ।

हार्ले डेभिड्सन र ट्रायम्फजस्ता निर्माताहरुले समेत मिड साइज सेग्मेन्टमा प्रिमियम मोटरसाइकल ल्याउन थालेपछि रोयल इन्फिल्डले नयाँ वाइकको विकासलाई तिव्रता दिएको हो । ७५० सीसीको बबर मोटरसाइकल संगै कम्पनीले ३५०, ४५० र ६५० सीसी सेग्मेन्टमा थप नयाँ मोडल समेत ल्याउने तयारी गरिरहेको छ ।