रोयल इनफिल्डको पहिलो इलेक्ट्रिक मोटरसाइकल लन्च, रेन्ज र मूल्य कति ?

रोयल इनफिल्डले अन्ततः भारतमा आफ्नो पहिलो इलेक्ट्रिक बाइक फ्लाइङ फ्ली सी६ लन्च गरेको छ । ब्याट्री–एज–ए–सर्भिस (बीएएएस) को विकल्प समेत दिइएको यस मोटरसाइकलको मूल्य ब्याट्री सहितका लागि २ लाख ७९ हजार र ब्याट्री वेगरको १ लाख ९९ हजार भारु निर्धारण गरिएको छ ।

सो नयाँ मोटरसाइकलमा रोयल इनफिल्डले गोलाकार हेडल्याम्प, टियरड्रप आकारको फक्स फ्युल ट्यांक र ब्लुटुथ कनेक्टिभिटी सहतिको ३.५ इन्चको गोलाकार टीएफटी इन्स्ट्रुमेन्ट कन्सोल उपलब्ध गराएको छ । रेट्रो लुक दिइएको यस मोटरसाइकलमा सिंगल सिट जडान गरिएको छ भने विकल्पका रूपमा पिलियन सिट समेत पाउन सकिनेछ ।

फ्लाइङ फ्ली सी६ मा ३.९१ किलोवाट आवर क्षमताको ब्याट्री जडान गरिएको छ, । ई–बाइकमा राखिएको पर्मानेन्ट सिंक्रोनस मोटरको अधिकतम आउटपुट २०.६५ बीएपची छ भने टर्क ६० एनएम रहेको छ । कम्पनीका अनुसार, यस बाइकले ३.७ सेकेन्डमै ०–६० किमी÷घण्टाको गति लिन सक्छ भने टप स्पिड ११५ किमी÷घण्टा रहेको छ ।

सिंगल चार्जमा १५४ किलोमिटर रेन्द दिने दाबी गरिएको यस मोटरसाइकलको ब्याट्रीलाई २ घण्टा १६ मिनेटमा फुल चार्ज गर्न सकिन्छ । त्यसैगरी २० देखी ८० प्रतिशतसम्मको चार्ज १ घण्टा ५ मिनेटमै गर्न सकिन्छ ।

सुरक्षाका लागि बाइकमा डुअल च्यानल एबीएस र दुबै चक्कामा डिस्क ब्रेक जडान गरिएको छ । एड्जस्टेवल रिजेनेरिटिभ ब्रेकिङ समेत उपलब्ध यस मोटरसाइकलमा ५ भिन्न राइडिङ मोड दिइएको छ ।