मूल्य घटेपछि नेपाली बजारमा रोयल इन्फिल्डको चर्चा, माग धान्न कम्पनीलाई धौधौ

आगामी आर्थिक वर्षको बजेटमा सरकारले २०० देखि ४०० सीसीसम्मका मोटरसाइकलमा अन्तःशुल्क छुट र सडक दस्तुर घटाएपछि सो सेग्मेन्टका मोटरसाइकलको मूल्य कम भइरहेको छ । सो सेग्मेन्ट अन्तर्गत अनएसेम्बल अवस्थामा आयात हुने मोटरसाइकलमा ३० प्रतिशत र एसेम्वल भएर आयात हुने मोटरसाइकलमा ७० प्रतिशत अन्तःशुल्क लाग्ने व्यवस्था गरिएपछि स्वदेशमै एसेम्बल हुने मोटरसाइकलको मूल्यमा १ लाख ५० हजार रुपैयाँसम्मले कमी आएको हो । यसअघि विदेशमा एसेम्बल भएर आउने मोटरसाइकलमा ९० प्रतिशत अन्तःशुल्क लाग्दै आएको थियो ।

अन्तःशुल्क र सडक दस्तुक कम भएपछि रोयल इन्फिल्डको क्लासिक ३५० मा एकैपटक १ लाख ४९ हजार रुपैयाँले कमी आएको छ । यसअघि ६ लाख ५० हजारमा बिक्री हुँदै आएको सो मोटरसाइकलको नयाँ मूल्य ४ लाख ९९ हजार कायम गरिएको छ । साथै गत वर्ष भारतमा सार्वजनिक भएको स्क्राम ४११ बजेट अघि ९ लाख हाराहारीमा नेपाल आउने अनुमान गरिएकोमा सो नयाँ बाइकको मूल्य समेत निकै प्रतिस्पर्धी कायम गरिएको छ । स्क्रामलाई आधिकारिक वितरक अल्फा अटोमोटिभले ६ लाख ६० हजारमा बिक्री थालेको छ । यी दुवै मोडलको नेपालमा एसेम्बल थालिएका कारण पनि मूल्य सस्तो पर्न गएको हो ।

अनुमान गरिएभन्दा मूल्य निकै नै कम भएपछि अहिले नेपालको टु ह्विलर बजारलाई रोयल इन्फिल्डले राम्रैसँग तताएको छ । बजारमा अहिले यी दुई बाइकको विषयलाई लिएर चर्चा चुलिँदो छ । जसको सिधा प्रभाव बिक्रीमा समेत देखिन थालेको छ । अल्फा अटोमोटिभ स्रोतका अनुसार नयाँ मूल्य सार्वजनिक भएपछि क्लासिक र स्क्राम खरिद गर्नेहरुको लर्को नै लाग्ने गरेको छ ।

ग्राहकको माग वढ्न थालेपछि कम्पनीले बुकिङ लिएको करिब २० दिनभित्र डेलिभरी दिने प्रतिवद्धतासहित बाइक बुकिङ लिदै आएको छ । ‘नयाँ मूल्य सार्वजनिक भएपछि देशैभरबाट राम्रो बुकिङ आइरहेको छ । हामी ग्राहकलाई छिटोभन्दा छिटो डेलिभरी कसरी दिन सकिन्छ भनेर चिन्तित छौ । बाइकको एसेम्बल स्वदेशमै हुने कारण छिटो डेलिभरी दिन सहज भइरहेको छ’ कम्पनी स्रोतको भनाइ छ ।

ठूलो लगानीमा अत्याधुनिक प्लान्ट लगाएर स्वदेशमै एसेम्बल थालेको उद्योगले वार्षिक २० हजार युनिट मोटरसाइकल एसेम्बल गर्नसक्ने कम्पनीको भनाइ छ । यसअघि नेपालमा रोयल इन्फिल्डले सवैभन्दा बढी ७ हजार युनिटसम्म मोटरसाइकल बिक्री गरेको थियो । तर अब मूल्यमा कमी आएपछि माग वढ्ने र आगामी आर्थिक वर्षमा सो संख्या दोब्बरले वृद्धि हुने अनुमान गरिएको छ ।

कम्पनीले यहाँ उत्पादन भएको मोटरसाइकललाई अन्य देशमा समेत निर्यात गर्ने सोच बनाएको वुझिएको छ ।