२ मिनेटमै सोल्ड आउट भयो रोयल इन्फिल्डको ६५० लिमिटेड एडिसन ट्विन्स

रोयल इन्फिल्डले आफ्नो १२० औँ बार्षिकोत्सवको अबसर पारेर उत्पादन गरेको इन्टरसेप्टर ६५० र जीटी कन्टिनेन्टल ६५० को १२० युनिट पूर्ण रुपमा सोल्ड आउट भएको छ । बिक्री खुल्ला गरिएको २ मिनेटको किर्तिमानी समयमै यी बाइक बिक्री भएका हुन् । कम्पनीले यी दुई मोडललाई ६० युनिटका दरले कुल १२० युनिट उत्पादन गरेको थियो ।

मेकानिकल पक्ष र अन्य फिचर्समा कुनै परिबर्तन नगरिएको यो बाइकको लुक्स तथा डिजाइनमा भने कम्पनीले केही परिबर्तन गरेको थियो । यो बाइकको इन्जिन, साइलेन्सर र अन्य भागमा समेत ब्ल्याक कलरको फिनिसिङ दिइएको छ । ब्ल्याक क्रोम कलर स्किम र ह्यान्ड क्राफ्टेड ब्रास ट्यांक ब्याजसहित सार्बजनिक गरिएको यो बाइकमा राइडरले अत्याधिक रुची देखाएपछि कम्पनीले निकट भबिष्यमै यसको मास प्रोडक्सन थाल्ने जनाएको छ ।

यसमा कम्पनीले यसअघिको रेगुलर मोडलमा उपलब्ध गराउँदै आइरहेको ३ बर्ष वारेन्टिलाई बढाएर ५ बर्षसम्म पुर्याएको छ । यसको मूल्य २ लाख ७५ हजारदेखी ३ लाख १३ हजार भारुसम्म निर्धारण गरिएको थियो ।