राउन्ड टु रोड रेसिङ च्याम्पियनसिप चितवनमा सम्पन्न, यी राइडर बने विजेता

चितवन – चितवनको भरतपुरमा सम्पन्न नेपाल रोड रेसिङ च्याम्पियनसिप राउन्ड टुमा सुजन थापा मगर र संस्कार विष्ट विजयी बनेका छन् ।

गत शनिबार सम्पन्न सो च्याम्पियनसिपमा नेसनल र नोभिस तर्फ प्रतियोगिता भएको थियो । नेसनल तर्फ सुजन थापा विजयी बने भने अजय तामाङ र रितेश खत्रीले दोस्रो र तेस्रो स्थान हासिल गरे ।
त्यसैगरी नोभिस तर्फ संस्कार विष्ट विजयी बने भने अभिनव राज मल्ल र रुमुहाङ राईले दोस्रो र तेस्रो स्थान हासिल गरे ।

विजयी खेलाडीहरुलाई नेपाल अटोमोबाइल्स एसोसिएसन (नासा नेपाल) का कार्यकारी निर्देशक गोविन्द भट्टराई र नासा बागमतीका अध्यक्ष राजन पियाले पुरस्कार प्रदान गरे ।

मोटर स्पोर्ट्स नेपाल क्लबले आयोजना गरेको नेपाल रोड रेसिङ च्याम्पियनसिपलाई मोटरसाइकल रेसिङको अन्तर्राष्ट्रिय संगठन एफआईएम र त्यसको सदस्य नासा नेपाल लगायतका संघ संस्था एवम् टीभीएस र यामाहा मोटरसाइकलको समेत सहयोग रहेको थियो ।

च्याम्पियनसिपका लागि चितवन अटोमोबाइल डिलर्स एसोसिएसन तथा सेल, लिक्वी मोली, पेट्रोनस, गल्फ, क्यास्ट्रोल, एभरेष्ट लुब्रिकेन्ट एवम् कवच गियर लगायतको सहयोग रहेको थियो ।

च्याम्पियनसिप यो भन्दा पहिले काठमाडौंमा सम्पन्न भइसकेको छ । यो वर्ष काठमाडौं, चितवन, पोखरा र फेरि काठमाडौंमा गरी चार स्थानमा च्याम्पियनसिप आयोजना गरिने कार्यक्रम रहेको मोटर स्पोर्ट्स नेपाल क्लबका कार्यकारी निर्देशक विनोद तण्डुकारले बताए ।