नेपाल आयो स्कुटरको एसयूभी ‘रिभर इन्डी’, नाइमा मोबिलिटी एक्सपोमा सार्बजनिक हुने

काठमाडौं–नेपालको विद्युतीय दुई–पांग्रे बजारमा एउटा नयाँ प्रिमियम विद्युतीय स्कुटर भित्रिने भएको छ । विशाल इन्टरप्राइजेजले आगामी नाइमा नेपाल मोबिलिटी एक्स्पोमा अन्तर्राष्ट्रिय स्तरमा ख्यातिप्राप्त ’रिभर इन्डी’ सार्वजनिक गर्ने तयारी गरेको हो । कम्पनीले यस स्कुटरलाई ३ लाख ७० हजार रुपैयाँमा लन्च गर्ने जनाएको छ ।

यी स्कुटरलाई कम्पनीले काठमाडौंका विभिन्न सडकहरूमा, विशेष गरी ह्वाइट गुम्बा क्षेत्रको कठिन उकालो खण्डमा परीक्षण गरिसकेको छ । औपचारिक लन्च अगावै स्थानीय सडक तथा भौगोलिक अवस्था अनुसार स्कुटरको क्षमता र कार्यक्षमता परीक्षण गर्ने कम्पनीको प्रयासलाई सकारात्मक मानिएको छ ।

नेपालमा विद्युतीय सवारी साधनको प्रयोग तीव्र गतिमा बढिरहेको र ग्राहकले उत्कृष्ट कार्यक्षमता, व्यावहारिक उपयोगिता र मजवुत स्कुटर खोजिरहेको अवस्थामा यो स्कुटर बजारमा आउन लागेको हो ।

स्कुटरको एसयूभीका रूपमा परिचित रिभर इन्डीमा ४ किलोवाट आवरको ब्याट्री प्याक जडान गरिएको छ । उक्त ब्याट्रीलाई फुल चार्ज गरेपछि १६० किलोमिटरसम्म रेन्ज दिने दाबी गरिएको छ भने यसलाई ९० किलोमिटर प्रति घन्टको उच्च गतिमा हाँक्न सकिन्छ । साथै, स्कुटरमा १८–डिग्री ग्रेडिबिलिटी क्षमता, १७७ मिमीको उच्च ग्राउन्ड क्लियरेन्स, १४–इन्चका आकर्षक ह्विल, ५५ लिटरको विशाल लक गर्न मिल्ने स्टोरेज कम्पार्टमेन्ट, चालकका लागि विशेष फुटपेग र ८ वर्षसम्मको लामो वारेन्टी जस्ता विशेषताहरू पाउन सकिन्छ ।

भारतको बेंगलुरुस्थित विद्युतीय सवारी साधन निर्माता कम्पनी रिभरद्वारा निर्मित यस स्कुटरले अन्तर्राष्ट्रिय स्तरमा समेत ठूलो सफलता हासिल गरेको छ । रिभर इन्डीले प्रतिष्ठित ‘रेड डट डिजाइन कन्सेप्ट अवार्ड २०२४’ र ’रेड डट प्रोडक्ट डिजाइन अवार्ड २०२५’ दुवै प्राप्त गरिसकेको छ ।

कम्पनीका अनुसार, यी दुवै अवार्ड जित्ने यो एकमात्र भारतीय दुई–पांग्रे सवारी साधन हो, जसले यसको उत्कृष्ट डिजाइन र इन्जिनियरिङ नवीनतालाई विश्वव्यापी रूपमा प्रमाणित गरेको छ ।

एक्स्पोमा आउने अवलोकनकर्ताले विशाल इन्टरप्राइजेज नेपालको पेभिलियनमा पुगेर रिभर इन्डीलाई प्रत्यक्ष रूपमा अनुभव गर्न सक्नेछन् ।