रिभोल्टको इलेक्ट्रिक मोटरसाइकललाई चाबीविनै स्मार्टफोनबाट स्टार्ट गर्न सकिने

रिभोल्ट मोटर्सका सबै इलेक्ट्रिक बाइकलाई राइडरको स्मार्टफोनबाटै भर्चुअल की प्रयोग गरी स्टार्ट गर्न सकिने भएको छ । स्मार्टफोनको माईरिभोल्ट एपको प्रयोग गरी यसलाई स्विच अफ र अन गर्न सकिने छ ।

रिभोल्टको यो फिचर आगामी सेप्टेम्बर देखि रिभोल्ट इलेक्ट्रिक मोटरसाइकलका लागि उपलब्ध हुनेछ । पहिले देखि नै उपलब्ध आरभी ४०० मा अब सिस्टम अपग्रेड गरेर यो फिचर प्रयोग गर्न सकिने छ भने अब आउने नयाँ मोटरसाइकल सबैमा यो फिचर उपलब्ध हुनेछ ।

रिभोल्ट इलेक्ट्रिक मोटरसाइकलमा आर्टिफिसियल इन्टेलिजेन्स र एड्भान्स्ड क्लाउडमा आधारित सफ्टवेयर हुने र यसैका कारण नयाँ फिचर प्रयोग गर्न सकिने बताइएको छ । कम्पनीले भारतमा यस्तो प्रविधि पहिलो पटक उपलब्ध गराउन लागेको समेत कम्पनीले दाबी गरेको छ ।

उक्त बाइकलाई स्टार्ट गर्नका लागि एप खोलेर पावर बटन बायाँबाट दायाँ स्लाइड गरे पुग्ने बताइएको छ । यसका लागि चाबीको आवश्यकता नै नपर्ने भएको छ ।

भारतमा पछिल्लो समयमा रिभोल्टको इलेक्ट्रिक मोटरसाइकलले निकै नै चर्चा पाइरहेको छ । यो अवस्थामा यस्तो नयाँ फिचरले झन् धेरैलाई लोभ्याउने अनुमान गर्न सकिन्छ ।