रेनोले ९ लाख कार बेच्दै नयाँ कीर्तिमान बनायो, अब नयाँ कार ल्याउने तयारीमा

फ्रान्सेली अटोमोबाइल कम्पनी रेनोले नयाँ रेकर्ड बनाएको छ । कम्पनीले ११ वर्षभित्र ९ लाख सवारीसाधन बिक्री गरेको छ । कम्पनीले हाल भारतीय बजारमा क्विड, काइगर र ट्राइबर गरी ३ वटा कार उपलब्ध गराएको छ । नेपाली बजारमा समेत यी सवारी साधन बिक्री भइरहेका छन् ।

रेनोको क्विड कार सबैभन्दा धेरै बिक्री हुने कार मध्ये एक हो । यो हाल १.० लिटर इन्जिनमा प्रस्तुत गरिएको छ । सो मोडल म्यानुअल र अटो ट्रान्समिशनमा उपलब्ध छ । यो भन्दा पहिला रेनो क्विड ८०० सीसी मोडलमा उपलब्ध थियो । तर अप्रिलदेखि बीएस६ फेज २ लागू भएपछि कम्पनीले यसको प्रोडक्शन बन्द गरेको छ ।

कम्पनीको सबैभन्दा लोकप्रिय एसयूभी डस्टरको न्यू जेनेरेशन पनि चाँडै लन्च हुने भएको छ । नयाँ डस्टर २०२४ अटो एक्सपोमा सार्वजनिक गर्ने अनुमान गरिएको छ । सो कारले क्रेटा, नेक्सन र ह्यारियर जस्ता एसयूभीसँग प्रतिस्पर्धा गर्नेछ ।

नयाँ डस्टरमा नयाँ इन्जिन, डिजाइन र फिचर दिइनेछ । साथै कम्पनीले भारतमा केही थप कार पनि लन्च गर्ने योजना बनाएको छ । आगामी दिनमा कम्पनीले आफ्नो कारको लाइनअपमा ३ वटा कार थप्न सक्नेछ ।