पावर नघटाई नेपाल आएको प्रोटोन ईमास ७ चर्चामा, मूल्य र विशेषतामा यस्ता छन् अन्य प्रतिस्पर्धी

मोटर क्षमताका आधारमा कर निर्धारण हुने प्रावधानसँगै अधिकांश विद्युतीय गाडी पावर घटेर नेपाल आए । उत्पादक कम्पनीले गाडीको साइज, ब्याट्री र पर्फमेन्सलाई आधार मानेर कति पिक पावर भएको मोटर जडान गर्नुपर्छ भन्ने निक्र्योल गरेका हुन्छन् । तर, नेपालमा मोटर क्षमता धेरै भएका ईभीमा कर बढी पर्ने र यसले गाडीको मूल्य महंगो बनाउने भन्दै धेरै आयातकर्ताले मोटर नै घटाएर ईभी ल्याए ।

तर, पछिल्लो समय नेपाल भित्रिएको प्रोटोन ईमास ७ भने पावर नघटिकनै नेपाल आएको छ । प्रोटोन गाडीको नेपालका लागि आधिकारिक वितरक जगदम्बा मोटर्स प्रालिले मलेसियन बजारमा बिक्री हुँदै आएको १६० किलोवाटकै मोटरमा ईमास ७ लाई नेपाल ल्याएको हो । १६० किलोवाट पीक पावर भएको मोटर जडान भएपनि यसको मूल्य भने निकै प्रतिस्पर्धात्मक छ । प्राइम र प्रिमियम गरी दुई भेरिएन्टमा उपलब्ध प्रोटोन ईमास ७ को मूल्य क्रमशः ५६ लाख ९९ हजार र ६७ लाख ९९ हजार रुपैयाँ तोकिएको छ ।

यस्तो छ फिचर, रेन्ज र ब्याट्री
ईमास ७ प्रोटोनको पहिलो विद्युतीय सवारी साधन अर्थात ईभी हो । यो ग्लोबल मोड्युलर आर्किटेक्चर (जीएमए) प्लेटफर्ममा निर्माण गरिएको छ । यसमा १२–इन–१ इन्टेलिजेन्ट इलेक्ट्रिक प्रोपल्सन सिस्टम रहेको छ भने नवीनतम सेल–टु–बडी (सीटीबी) ब्याट्री संरचना छ । त्यसैगरी यसममा नयाँ पुस्ताको एजिस शर्ट–ब्लेड ब्याट्री (लिथियम आइरन फस्फेट) रहेको छ ।

सुरक्षाका लागि यसमा लेभल २ एडभान्स्ड ड्राइभर असिस्टेन्स सिस्टम छ भने ३६० डिग्री भ्यु क्यामेरा, फाइभ स्टार एसियन एनक्याप सेफ्टी रेटिङ, १६० किलोवाट पावर र ३२० एनएम टर्क जेनेरेट गर्ने क्षमता छ भने यसलाई ० देखि १०० किलोमिटर प्रतिघण्टा पुग्न ६.९ सेकेन्ड मात्र लाग्छ । त्यसैगरी १०० किलोमिटर प्रतिघण्टाबाट रोक्न ३५ मिटर ब्रेकिङ दूरी मात्र चाहिन्छ ।

ईमास ७ को प्राइम भेरिएन्टमा ४९.५२ किलोवाट आवरको ब्याट्री छ र यसले डब्लुएलटीपी अनुसार सिंगल चार्जमा ३४५ किलोमिटर रेन्ज दिन्छ । त्यसैगरी प्रिमियम भेरिएन्टमा ६०.२२ किलोवाट आवरको ब्याट्री छ र यसले डब्लुएलटीपी अनुसार सिंगल चार्जमा ४१० किलोमिटर रेन्ज दिन्छ । यसले डीसी फास्ट चार्जिङ सपोर्ट गर्छ र ३० प्रतिशतबाट ८० प्रतिशत चार्ज हुन २० मिनेट मात्र लाग्छ । १० मिनेट चार्ज गर्दा यसलाई १३५ किलोमिटर सम्म चलाउन सकिन्छ ।

कारको इन्टेरियरमा भेन्टिलेटेड सिटहरू छन् भने प्रशस्त लेगरुम रहेको छ । ३३ स्टोरेज कम्पार्टमेन्टहरू रहेको प्रोटोन ईमास ७ ईभीमा वानोस प्रविधिसहितको १६ स्पिकर साउन्ड वेभ सिस्टम छ भने २५६ रङको एम्बियन्ट लाइटिङ छ, जुन यो सेगमेन्टकै सर्वश्रेष्ठ भएको कम्पनीको भनाइ छ । यसमा २.५ के रिजोल्युन सहितको १५.४ इन्चको टचस्क्रिन डिस्प्ले रहेको छ । एसिएन एनक्यापको सेफ्टी टेष्टमा फाइभ स्टार रेटिङ पाउन सफल यस कारमा सुरक्षाका लागि लेभल २ एडभान्स्ड ड्राइभर असिस्टेन्स र ३६० डिग्री भ्यु क्यामेरासहित अन्य थुप्रै सेफ्टी फिचर पाउन सकिन्छ ।

यी ईभीसँग प्रतिस्पर्धा
निकै नै प्रतिस्पर्धात्मक सेग्मेन्टमा आएको ईमास ७ ले बजारमा स्थापित भैसकेका बीवाईडी एट्टो ३ र ओमोडा ई५ देखि हालै बिक्री सुरु भएका जीएसी एवोन भी, टाटा कर्भ र एमजी एस५ लगायत ईभीसँग प्रतिस्पर्धा गर्नुपर्ने छ ।

प्रोटोन ईमास ७ को सबैभन्दा ठूलो प्रतिस्पर्धीका रुपमा बीवाईडी एट्टो ३ लाई लिन सकिन्छ । यी दुई ईभीको ब्याट्री प्याक र मुल्य समेत लगभग उस्तैउस्तै छ । ४९.९२ र ६७.८० किलोवाट आवर ब्याट्री प्याकमा उपलब्ध एट्टो ३ को मूल्य ५६ लाख ९० हजार र ६७ लाख ८० हजार निर्धारण गरिएको छ । जुन ईमास ७ को तुलनामा केही सस्तो समेत पर्छ । विद्युतीय एसयूभीमा निकै राम्रो पकड बनाएको र ईभी इकोसिस्टम समेत तयार भैसकेका कारण बीवाईडी एट्टो ३ को बजार स्थापित भैसकेको छ ।

यसैगरी, प्रोटोन ईमास ७ को प्रतिस्पर्धीका रुपमा हेरिएको ओमोडा ई५ मा ६१ किलोवाट आवरको ब्याट्री प्याक जडान गरिएको छ भने यसको सुरुवाती मूल्य ६१ लाख ९९ हजार रुपैयाँ पर्छ । ओमोडा, नेपाल आएको एक वर्ष पुरा भएको अवसरमा आधिकारिक वितरक एसपीजी अटोमोबाइल्स प्रालिले ३ लाख नगद छुट सहित २ लाख १५ हजार रुपैयाँ बरावरको अतिरिक्त लाभ दिएका कारण ई५ झनै सस्तो भएको छ ।

अर्को ईभी ब्रान्ड जिएसीको एवोन भी मोडल समेत ईमास ७ को प्रतिस्पर्धी हो । ६२.७ र ७५.३ किलोवाट आवर क्षमताको ब्याट्री प्याकमा उपलब्ध एवोन भीको मूल्य ६५ लाख र ७० लाख निर्धारण गरिएको छ । ब्याट्री प्याकका आधारमा एवोन भी यही सेग्मेन्टका अन्य ईभीको तुलनामा केही मजबुत देखिन्छ ।

टाटा मोटर्सले हालै लन्च गरेको कर्भ ईभीले पनि प्रोटोन ईमास ७ लाई टक्कर दिने देखिन्छ । कर्भ ईभीमा ५५ किलोवाट आवरको ब्याट्री प्याक जडान गरिएको छ भने यसको मूल्य ५७ लाख रुपैयाँ निर्धारण गरिएको छ ।

त्यस्तै, हालै नेपाल आएर बिक्री सुरु भएको एमजी एस५ को लङ रेन्ज भेरिएन्टलाई पनि ईमास ७ को प्रतिस्पर्धीको रुपमा लिन सकिन्छ । एमजी एस५ को लङ रेन्ज भेरिएन्टमा ६२.२ किलोवाट आवर क्षमताको ब्याट्री प्याक जडान गरिएको छ भने यसको मूल्य ५५ लाख रुपैयाँ निर्धारण गरिएको छ ।