बजेट पश्चात होन्डाका यी दुई बिग बाइकको बढ्यो मूल्य, यस्तो छ अबको मूल्य

काठमाडौं – नेपाली बजारमा उपलब्ध होन्डा सीबी ३५० सिरिजका दुई मोटरसाइकल सीबी हाइनेस ३५० र सीबी ३५० आरएसको मूल्य बढेको छ ।

अन्य कम्पनीले २०० सीसी भन्दा माथिल्लो श्रेणीका मोटरसाइकलको मूल्य घटाइरहेको समयमा होन्डाको नेपालका लागि आधिकारिक वितरक स्याकार ट्रेडिङ कम्पनीले भने यी दुई मोटरसाइकलको मूल्य बढाएको हो ।

कम्पनीले यी दुवै मोटरसाइकलको मूल्यमा ७६ हजार रुपैयाँले वृद्धि गरेको हो । यसअघि ८ लाख ४९ हजार रुपैयाँमा बिक्री भइरहेको सीबी हाइनेस ३५० को मूल्य ९ लाख २५ हजार रुपैयाँ पुगेको छ ।

त्यसैगरी सीबी ३५० आरएसको मूल्य ८ लाख ९९ हजार रुपैयाँबाट बढाएर ९ लाख ७५ हजार रुपैयाँ पुगेको छ।

कम्पनीले गत असार ६ गते देखि लागू हुने गरी मूल्य वृद्धि गरेको हो ।

यो भन्दा पहिले बजेट सार्वजनिक हुनु अघि नै गत जेठ ९ देखि होन्डाको स्पोर्ट्स मोटरसाइकल एक्सआर १९० एलको मूल्य वृद्धि भएको थियो ।

पहिले ७ लाख १९ हजार ९ सय रुपैयाँ मूल्य रहेको सो मोटरसाइकलको मूल्य हाल ७ लाख ३९ हजार ९ सय रुपैयाँ छ । यसको मूल्यमा २० हजार रुपैयाँले वृद्धि भएको थियो ।

कम्पनीबाटै मूल्य बढेर आएको हुनाले यी मोटरसाइकलको मूल्य पनि बढेको कम्पनीको भनाइ छ ।