नाडा अध्यक्षको उम्मेदवार बन्ने ध्रुब थापाको घोषणा : भन्छन् – सबै व्यवसायीको नाडा बनाउने छु

काठमाडौं – अटोमोबाइल व्यवसायीहरुको संगठन नाडा अटोमोबाइल्स एसोसिएसन अफ नेपालको अध्यक्षका लागि पोखराका व्यवसायी ध्रुबबहादुर थापाले उम्मेदवारी घोषणा गरेका छन् । झन्डै ३ दशक देखि अटोमोबाइल क्षेत्रमा कार्यरत थापा हाल नाडामा विद्युतीय सवारी साधन समितिको सभापति समेत छन् ।

नाडामा यो भन्दा पहिले २ कार्यकाल सम्म उनी उपाध्यक्ष भएर कार्य गरिसकेका छन् । उनी पश्चिमाञ्चल अटोमोबाइल डिलर्स एसोसिएसनका पूर्व अध्यक्ष समेत हुन् ।

झन्डै ३ दशक देखि अटोमोबाइल क्षेत्रमा कार्यरत थापाले अटोमोबाइल क्षेत्रमा हिमालय अर्गनाइजेसनमार्फत कार्य गरिरहेका छन् । उनले फोर्स गाडीका लागि नेपालको इम्पोर्टर तथा डिष्ट्रिव्युटर्स भएर काम गरिरहेका छन् । निमजी इलेक्टिक थ्रि ह्विलर्सको इम्पोटर तथा डिष्ट्रिव्युटर्स, ब्राइसन इलेक्ट्रिक बसको इम्पोर्टर तथा फोर्ड गाडी र सुजुकी टु ह्विलर्सका लागि गण्डकी धौलागिरी क्षेत्रका लागि डिलर भएर काम गरिरहेका छन् ।

नाडालाई सबै व्यवसायीहरुले आफ्नो संगठनको रुपमा मान्न सक्ने गरी कार्य गर्नका लागि आफूले उम्मेदवारी घोषणा गरेको थापाले बताए । उनले भने, ‘एक व्यवसायीले अर्को व्यवसायीले नरुचाउने हालको अवस्थालाई चिर्दै एक व्यवसायीले अन्य सबै व्यवसायीलाई चिन्ने र सहकार्य गर्ने गरी नाडालाई अगाडि बढाउने उद्देश्य राखेर कार्य गर्नेछु ।’

हाल सम्मको अवस्थामा सीमित कम्पनीहरुको घेरावन्दीमा नाडा रहेको र उनीहरुले चाहेको व्यक्ति मात्र नाडाको नेतृत्वमा आउने, मोफसलको प्रतिनिधित्व नहुने अवस्थामा यसलाई चुनौती दिने गरी अगाडि बढ्ने आफ्नो योजना रहेको उनले बताए ।

नाडालाई प्रादेशिक संरचनालाई लगेर मात्र हुँदैन, त्यही अनुसार अधिकार प्रत्यायोजन गर्नु पनि आवश्यक छ । यसको लागि समेत सवारी आयातकर्ता, पार्ट्स र अन्य एसेसरिज सबै आयातकर्ता व्यवसायीहरुलाई समेटेर अगाडि बढ्ने योजना रहेको उनले बताए ।

आगामी पुस सम्म अधिवेशन गरेर नयाँ नेतृत्व चयन गरिसक्नु पर्ने अवस्थामा हालको अवस्थालाई मध्यनजर गरी सम्भवतः भदौ महिना भित्रै अधिवेशन गरेर नयाँ नेतृत्व चयन गर्ने नाडाको योजना रहेको बताइएको छ ।

हाल नाडा अध्यक्षको रुपमा कृष्णप्रसाद दुलाल कार्यरत छन् । यो भन्दा पहिले हालका उपाध्यक्ष करण चौधरीले पनि अध्यक्षको उम्मेदवारी घोषणा गरिसकेका छन् ।