चीनले सन् २०३५ सम्म ग्यासोलिन पावर्ड कार फेज आउट गर्ने

चीनले सन् २०३५ सम्म ग्यासोलिन पावरबाट चल्ने सबै कार फेज आउट गर्ने भएको छ । निक्की एसियामा प्रकाशित रिपोर्ट अनुसार चीनको इन्डष्ट्री तथा इन्फर्मेसन टेक्नोलोजी मन्त्रालयको निर्देशन अनुसार यसका लागि आवश्यक रोडम्याप तयार गरिएको हो ।

चीनको भविष्यको अटोमोटिभ नीतिका लागि यो एउटा आधार हुनेछ । रोडम्याप अनुसार सन् २०३५ सम्म बिक्री हुने कार मध्ये आधा ‘न्यु इनर्जी’ भेइकल हुनेछन् भने आधा हाइब्रिड हुनेछन् । क्रमिक रुपमा गरिने सो रुपान्तरण अनुसार न्यु इनर्जी मोडल मध्ये ९५ प्रतिशत इलेक्ट्रिक सवारी हुनेछन् ।

त्यसैगरी सन् २०३० सम्म यस्ता हाइब्रिडमा ७५ प्रतिशत ग्यासोलिन पनि हुनेछ भने २०३५ सम्म शतप्रतिशत हुनेछ । यसको अर्थ हाइब्रिडमा हुने पावरट्रेनमा ग्यासोलिन इन्जिन पनि समावेश हुन सक्ने छ । २०३५ पछि परम्परागत ग्यासोलिन पावर्ड कार भने उत्पादन हुने छैनन् ।

चीनले यो भन्दा पहिले पनि यस प्रकारको दिशामा आवश्यक कार्य भने गरेको थियो । वास्तवमा चीनले सन् २००९ र २०१९ देखि नै यस प्रकारका नयाँ कारलाई अनुदान दिने नीति लिएको थियो । चीनले अहिले पनि विश्वमा बिक्री हुने न्यु इनर्जी कार मध्ये करिब आधा संख्यामा उत्पादन गर्दै आएको छ । यद्यपि चीनमा बिक्री भएका कार मध्ये यी ५ प्रतिशत मात्र छन् ।

चीन भन्दा पहिले नै अन्य केही देशले समेत यस दिशामा कार्य गरिरहेका छन् । नर्वेले इन्टरन कम्बसन इन्जिनयुक्त गाडीलाई सन् २०२५ देखि नै पूर्ण रुपमा निषेधित गर्ने घोषणा गरेको छ । त्यसैगरी आइसल्यान्ड, इजरायल र सिंगापुरले पनि यस्तै घोषणा गरेका छन् ।

नेपालले पनि विस्तारै यस दिशामा जाने घोषणा भने गरेको छ । तर के सम्भव होला ?