अन्तर्राष्ट्रिय बजारमा बढ्यो पेट्रोलियम पदार्थको मूल्य, नेपालमा यथावत

काठमाडौं–अन्तर्राष्ट्रिय बजारबाट पेट्रोलियम पदार्थको मूल्य बढेर आए पनि नेपाल आयल निगमले यहाँको मूल्य यथावत् राखेको छ ।

निगमले एक विज्ञप्ति जारी गरेर आम उपभोक्ताको हितलाई मध्यनजर गरी हाल कायम रहेको खुद्रा बिक्री मूल्यलाई नै निरन्तरता दिने निर्णय गरेको जनाएको छ ।

निगमका अनुसार भारतीय आयल निगमबाट प्राप्त नयाँ सूचीमा पेट्रोलमा २ रुपैयाँ ९ पैसा, डिजेलमा २ रुपैयाँ ४७ पैसा र खाना पकाउने ग्यासमा प्रतिसिलिन्डर १८ रुपैयाँ ५८ पैसा मूल्य बढेर आएको थियो ।

मूल्य वृद्धि भएर आए तापनि उपभोक्तालाई पर्न जाने असरलाई ध्यानमा राख्दै निगमले नेपालमा भने पेट्रोलियम पदार्थको मूल्य नबढाउने निर्णय गरेको विज्ञप्तिमा उल्लेख छ ।