पाथीभरा केबलकारको गरियो शिलान्यास, अबको १५ महिनाभित्र चढ्न पाइने

ताप्लेजुङको प्रसिद्ध धार्मिक तीर्थस्थल पाथीभरा मन्दिरमा जानका लागि केबलकार निर्माण गर्न शिलान्यास गरिएको छ l केबलकार निर्माणको सुरुवाती बिन्दु काफ्लेपाटीमा पूजासहित शुक्रबार शिलान्यास गरिएको हो ।

संविधानसभा सदस्य डम्बरध्वज तुम्बाहाम्फे र फुङलिङ नगरपालिकाका नगरप्रमुख अमिर मादेनले जिल्लावासीको उपस्थितिमा शिलान्यास गरेका हुन् ।

निर्माण कम्पनी हिमालय कन्स्ट्रक्सनका प्रमुख इन्द्र केदेमले पाथीभरा देवीको जय–जयकारसहित शिलान्यास गरिएको र अब काम द्रुत गतिमा हुने बताएका छन् । केबलकार कम्पनी सञ्चालक समिति सदस्य रुद्र पौडेलका अनुसार यसअघि केबलकार निर्माण हुने क्षेत्रमा रहेका रूखहरू हटाइएको थियो । शुक्रबार केबलकार निर्माणको औपचारिक शिलान्यास भएको उनले बताए ।

काम निरन्तर भएमा अबको १५ महिनाभित्र केबलकार चढ्न पाइने पौडेलले जानकारी दिए । ताप्लेजुङको पर्यटन प्रवर्द्धन, रोजगारी सिर्जना, वातावरणीय सन्तुलन र आर्थिक तथा सामाजिक रूपान्तरणका लागि केबलकार लाभदायक बन्ने बताइएको छ ।