दुर्घटनाका घाइतेको उद्दार कार्यमा खटिने सर्वसाधारणलाई ट्राफिक प्रहरीले विशेष सम्मान गर्ने

काठमाडौं – सडक दुर्घटनामा घाइते भएका सवारी धनी वा अन्य सर्वसाधारणलाई ट्राफिक प्रहरीले विशेष सम्मान गर्ने भएको छ । राजधानीको भृकुटीमण्डपमा चलिरहेको नाडा अटो शो २०२५ को सन्दर्भमा नाडाद्वारा आयोजित ‘सडक र यातायात’ सम्बन्धी छलफल अर्थात प्यानल डिस्कसनमा काठमाडौं उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक नवराज अधिकारीले सो जानकारी दिएका हुन् ।

सहभागीद्वारा राखिएको प्रश्नको उत्तर दिने क्रममा उनले यसका लागि आवश्यक तयारी भइरहेको र छिट्टै नै यो व्यवस्था कार्यान्वयनमा आउने बताए । हाल सडक दुर्घटनाका पीडितहरुलाई उद्दार गर्नु अति आवश्यक भए पनि विभिन्न कारणले उद्दार कार्यमा खटिन झन्झट महसुस भइरहेको गुनासो आइरहेको सन्दर्भमा संरक्षणकर्ताहरुलाई यसले सहजता पु¥याउने विश्वास उनले व्यक्त गरे ।

शनिबार सम्पन्न सो कार्यक्रममा प्रहरी वरिष्ठ उपरीक्षक नवराज अधिकारीले सार्वजनिक सवारी चालक, हेभी इक्विपमेन्ट व्यवसायी, निजी सवारी चालक, यातायात र अटोमोबाइल व्यवसायी सबैले आ-आफ्नो कर्तव्य सम्झेर सडक अनुशासन पालना गर्नमा गम्भीर भएर लागेमा नै ट्राफिक व्यवस्थापन सहज हुने बताए ।

सहरी क्षेत्र सार्वजनिक यातायात प्राधिकरणका कार्यकारी अधिकृत कुवेर नेपालीले सम्पूर्ण सहरी क्षेत्रको यातायात व्यवस्थापनका लागि कार्य गर्ने उद्देश्यका साथ प्राधिकरण स्थापना भएको र यसमार्फत अब पूर्ण रुपमा कार्य प्रारम्भ हुने चरणमा रहेको बताए । उनले आगामी दिनमा अटोमोबाइल व्यवसायीसँग समेत सहकार्य गरेर यातायात व्यवस्थापनमा लाग्ने प्रतिबद्धता व्यक्त गरे ।

नेपाल हेभी इक्विपमेन्ट व्यवसायी महासंघका अध्यक्ष उमाकान्त शर्माले हाल देशको आर्थिक अवस्था र अन्य कारणले हेभी इक्विपमेन्ट व्यवसायमा समेत समस्या आएको उल्लेख गर्दै यसको समाधानका लागि महासंघले सरकारी र अन्य निकायसँग विभिन्न पहल गरिरहेको बताए । उनले व्यवसायीका कर र पार्किङ तथा ढुवानी लगायतका विभिन्न समस्या समाधानका लागि ट्रापिक प्रहरी र अन्य निकायसँग सहयोगका लागि आग्रह गरे ।

नाडा अटोमोबाइल्स एसोसिएसन अफ नेपालका कार्यसमिति सदस्य तथा प्रदेश समन्वय समितिका सभापति प्रकाश कपुरीले नाडाले अन्य व्यवसायीका साथै मास ट्रान्सपोर्टेसनका लागि उपयुक्त बस र हेभी सवारी साधन सम्बन्धी व्यवसायीलाई पनि समेटिरहेको बताए । उनले सडक सुरक्षा सम्बन्धी विभिन्न जनचेतनामूलक कार्यका लागि नाडाले समेत कार्य गरिरहेको र आगामी दिनमा समेत प्रादेशिक रुपमा समेत यस्ता कार्य जारी रहने बताए ।

नेपाल अटो डटकमका सल्लाहकार सम्पादक एकराज सुवेदीद्वारा सञ्चालन गरिएको सो कार्यक्रममा उपस्थित विभिन्न व्यक्तिहरुले राखेका सडक र यातायात सम्बन्धी जिज्ञासाहरुको समेत सम्बोधन गरिएको थियो ।

सो प्यानल डिस्कसनले आगामी दिनमा सडक र यातायातलाई अझै सुरक्षित र व्यवस्थित गराउन महत्वपूर्ण भूमिका खेल्ने अपेक्षा गरिएको छ ।