सन् २०२१ मा चीनबाट २० लाख बढी कार निर्यात गरिए : टप ५ मध्ये अधिकांश नेपाली बजारमा

चाइना एसोसिएसन अफ अटोमोटिभ म्यानुफ्याक्चरर्स (सीएएएम) को रिपोर्ट अनुसार सन् २०२१ मा चीनबाट अन्य देशमा २० लाख १५ हजार युनिट कार निर्यात भएको छ । यो अघिल्लो वर्षको तुलनामा शतप्रतिशत बढी हो ।

त्यसैगरी अटोहोमले प्रकाशित गरेको रिपोर्ट अनुसार रेगुलर प्यासेन्जर भेइकल १६ लाख १४ हजार र कमर्सियल भेइकल ४ लाख २ हजार युनिट निर्यात भए । त्यसैगरी विभिन्न प्रकारका इलेक्ट्रिक सवारी साधन ३ लाख १० हजार युनिट निर्यात भए ।

यो वर्ष सबैभन्दा धेरै एसएआईसी मोटरले ६ लाख ९७ हजार युनिट निर्यात गरेको छ । एसएआईसीको सहायक कम्पनी एमजी मोटर्सले निर्यातको १५ प्रतिशत अर्थात ३ लाख ६० हजार युनिट निर्यात गरेको छ ।

दोस्रो नम्बरमा चेरी रहेको छ, जसले २ लाख ६९ हजार १५४ युनिट निर्यात गरेको छ । यो गत वर्ष भन्दा १३६.३ प्रतिशत बढी हो । चेरीले सन् २०२५ सम्म ५ लाख युनिट निर्यात गर्ने लक्ष्य लिएको छ । दक्षिण अफ्रिका, इन्डोनेसिया, रसिया, ब्राजिल र साउदी अरेबिया चेरीका मुख्य निर्यात बजार हुन् ।

तेस्रो नम्बरमा जीडब्लुएम अर्थात ग्रेटवाल मोटर्स रहेको छ । जीडब्लुएमले यो वर्ष १ लाख ४० हजार युनिट भन्दा बढी सवारी साधन निर्यात गरेको छ । जीडब्लुएमले विश्वका १७० भन्दा बढी देशमा ९ लाख भन्दा बढी सवारी साधन निर्यात गरिसकेको छ । जीडब्लुएमका ह्यावल एच६, ह्यावल जोलायन, ओरा गुडक्याट र पोअर पिकअप लोकप्रिय छन् ।

चौथो नम्बरमा जिली रहेको छ । जिलीले २०२१ मा १ लाख १५ हजार युनिट सवारी साधन निर्यात गरेको छ, जुन अघिल्लो वर्षको तुलनामा ५८ प्रतिशत बढी हो । जिलीले सन् २०२५ सम्म ६ लाख कार वार्षिक रुपमा निर्यात गर्ने लक्ष्य लिएको छ ।

चांगन अटोमोबाइलले १ लाख १० हजार युनिट सवारी साधन निर्यात गरेर पाँचौ स्थान हासिल गरेको छ । चांगनका सीएस७५, इयाडो प्लस र सीएस३५ प्लस विश्वका विभिन्न देशमा निर्यात हुने गरेका छन् ।

गत वर्ष टेस्लाको सांघाई प्लान्टमा उत्पादित करिब १ लाख ६० हजार कार युरोप र अष्ट्रेलिया लगायतको बजारमा निर्यात गरिए । त्यसैगरी नियो, एक्सपेङ र लि अटो जस्ता नयाँ कार ब्रान्डले पनि करिब १ लाख युनिट कार निर्यात गरेका छन्, जसको प्रमुख गन्तब्य बजार युरोप हो ।

अन्तर्राष्ट्रिय बजारमा निर्यात गरिने यी प्रमुख कम्पनीका उत्पादन नेपाली बजारमा पनि उपलब्ध छन् । एमजी, चेरी, जीडब्लुएम, चांगन आदि सबै ब्रान्ड नेपालमा उपलब्ध छन् ।

रोचक कुरा के छ भने एमजी मोटर्स पहिले देखि नै नेपाली बजारमा उपलब्ध भए पनि अन्य ब्रान्ड भने नेपाल भित्रिएको करिब एक वर्ष हाराहारी मात्र भएको छ । यसले नेपाली बजारमा पनि यी ब्रान्डको भविष्य आशावादी रहेको संकेत गर्छ ।