साढे २ महिना पछि खुल्यो ड्राइभिङ लाइसेन्सको अनलाइन फारम, पहिले भरेका सबै फारम रद्द

काठमाडौं – सवारी चालक अनुमति पत्र (स्मार्ट ड्राइभिङ लाइसेन्स)को अनलाइन फारम हिजो देखि फेरि खुलेको छ।

यातायात व्यवस्था विभागले हिजो सोमबार साँझ ६ बजेदेखि ड्राइभिङ लाइसेन्सको अनलाइन आवेदन फारम खुलाएको हो।

साढे २ महिनादेखि बन्द रहेको ड्राइभिङ लाइसेन्सको अनलाइन फारम प्रणाली जेठ १६ गतेदेखि सञ्चालनमा आएको हो।

विभागले २०७८ चैत १ गतेदेखि लाइसेन्सको अनलाइन आवेदन प्रणाली बन्द गरेको थियो। लाइसेन्स लिन चाहने सेवाग्राहीको अधिक चाप र सर्भरमा देखिने समस्याका कारण विभागले अनलाइन प्रणाली नै बन्द गरेको थियो।

सवारी चालक अनुमति पत्रका लागि applydl.dotm.gov.np लगइन गरी नयाँ आवेदन भर्न सकिने छ । यो भन्दा पहिले परेका सबै आवेदनहरु रद्द गरिएका छन् ।

त्यसैगरी वर्ग थप गराउनका लागि भने अर्को हप्ताको सोमबारबाट मात्र आवेदन खुला हुने बताइएको छ ।