शुरुमा १ रुपैयाँ मात्र बुझाएर यसरी किन्न सकिन्छ होन्डाको लोकप्रिय स्कुटर डियो डिलक्स

काठमाडौं – लकडाउन पश्चात उपलब्ध गराएको नयाँ खाले स्किम ‘१ रुपैयाँमा होन्डा डियो’ स्किम फेरि लागू भएको छ । नेपालका लागि होन्डाको आधिकारिक वितरक स्याकार ट्रेडिङ कम्पनीले हाल नयाँ वर्ष २०७८ को अवसरमा यो अफर फेरि लागू गरेको हो ।

यो अफर अन्तर्गत होन्डाका अन्य बाइक वा स्कुटर जस्तै होन्डा डियो पनि लिन सकिन्छ । डियोलाई नेपाली बजारमा विगत २० वर्ष यता सबैभन्दा बढी बिक्री भएको स्कुटर भनेर होन्डाले प्रवद्र्धन गरिरहेको छ । हाल नेपाली बजारमा बीएस६ डियो भर्खरै उपलब्ध गराइए तापनि सबै सोरुममा पुगिसकेको छैन । तर पहिले देखि नै उपलब्ध होन्डा डियो डीएलएक्स अर्थात डिलक्स यो स्किम अन्तर्गत लिन सकिन्छ ।

हाल होन्डा डियो डीलक्सको मूल्य २ लाख १६ हजार ९ सय रुपैयाँ तोकिएको छ । यस अनुसार १ रुपैयाँ डाउन पेमेन्ट मात्र बुझाएर ३६ महिना सम्म किस्ता तिरेर यो स्कुटर लिन सकिन्छ ।

यसरी स्कुटर लिदा १ रुपैयाँका साथै थर्ड पार्टी इन्स्योरेन्स १७ हजार २५०, रजिस्ट्रेसन शुल्क १ हजार र सेवा शुल्क ३ हजार ३९० रुपैयाँ गरी २१ हजार ६४० रुपैयाँ भने बुझाउनु पर्छ । यसरी होन्डा डियोलाई आफैले चलाउने गरी लैजान सकिन्छ ।

त्यसपछि भने मासिक रुपमा ३६ महिना सम्म ७ हजार ६२५ रुपैयाँका दरले किस्ता तिर्नु पर्छ ।

डियो डिलक्समा सीबीएस ब्रेकिङ सिष्टम र स्ट्याबिलिटी कन्ट्रोल, फुल्ली डिजिटल मिटर, मोबाइल चार्जिङ सकेट लगायतका आधुनिक विशेषता थपिएको छ । त्यसैगरी स्कुटरको पर्फमेन्स तथा माइलेजका ‘एचइटी’ इन्जिन, सिट ओपनिङ स्विचसँगै फोर इन वान लक, सर्भिस रिमाइन्डर इन्डिकेटर र गोल्ड रिमको विशेषता प्रदान गरिएको छ ।

होन्डा डियोमा एलईडी हेडलाइट जडान गरिएको छ । यसमा डिजिटल स्पिडोमिटर र ट्रिप मिटर छ । यसमा फ्रन्ट एन्ड रियर क्यारी हुक, लो–फ्यूल वार्निङ ल्याम्प, अल डिजिटल कन्सोल तथा मोबाइल चार्जिङजस्ता फिचर उपलब्ध छ ।

यसबाहेक स्कुटरको इन्जिन, लुक्स लगायत अन्य पक्षमा कुनै परिमार्जन गरिएको नगरिएको कम्पनीले जनाएको छ । यसमा १०९.१९ सीसी सिंगल सिलिन्डर एयरकुल्ड इञ्जिन छ, जसले ८ बीएचपी पावर तथा ८.९१ एनएम टर्क जेनेरेट गर्छ । यसको इञ्जिनमा भी–मेटिक सीभीटी गियरबक्स जडान गरिएको छ भने यो स्कुटर भारतीय प्रदूषण मापदन्ड बीएस फोरमा आधारित रहेको छ ।

बजारमा होन्डा डियोलाई निकै स्टाइलिस स्कुटरको रुपमा लिइन्छ । विभिन्न चार कलर अप्सनमा यो स्कुटर उपलब्ध छ ।