रोयल इन्फिल्ड मोटरसाइकल अब त्रिवेणी ग्रुपले बिक्री गर्ने, दुगड ग्रुपको वहिर्गमन

काठमाडौं – नेपाली बजारमा लामो समय देखि रोयल इन्फिल्ड मोटरसाइकलको आधिकारिक वितरकको रुपमा रहेको दुगड ग्रुपको अधिकार खोसिएको छ । अब त्रिवेणी ग्रुपले नेपालमा रोयल इन्फिल्ड मोटरसाइकल बिक्री–वितरण गर्नेछ ।

त्रिवेणी ग्रुपका डाइरेक्टर हर्ष संघाईले अब यसका लागि सम्पूर्ण तयारी थालिएको बताए । उनका अनुसार रोयल इन्फिल्ड ब्रान्डलाई न्याय दिलाउने गरी नेपालभर डिलरसिप विस्तार गरेर आगामी दिनमा कार्य गरिने छ ।

त्रिवेणी ग्रुप पहिलो पटक अटोमोबाइल व्यवसायमा प्रवेश गर्न लागेको हो । यो भन्दा पहिले यो ग्रुपले उत्पादन, ट्रेडिङ, बैंकिङ तथा इन्स्योरेन्स, ऊर्जा, रिटेल, मनोरन्जन तथा टुरिजम, कृषि लगायतका क्षेत्रमा लगानी गर्दै आएको छ ।

हाल सम्म दुगड ग्रुप अन्तर्गतको विवेक अटोमोबाइल्सले रोयल इन्फिल्ड मोटरसाइकल बिक्री–वितरण गरिरहेको थियो । सन् १९७२ देखि विभिन्न ब्रान्ड बिक्री वितरण गर्दै आएको एमभी दुगड ग्रुपले महिन्द्राका कमर्सियल भेइकल, अमेरिकन ट्याक्टर ब्रान्ड जोन डियर तथा पियाजीयोको थ्री ह्विलर एवं भेस्पा र अप्रिलिया स्कुटर समेत बिक्री–वितरण गरिरहेको छ ।

नेपाली बजारमा बुलेट बाइकको रुपमा परिचित यो ब्रान्डका मोटरसाइकल फरक लुक र आकर्षक फिचरका कारण धेरैले रुचाउने मोटरसाइकल ब्रान्ड हो ।

नेपाली बजारमा क्लासिक ३५० सबैभन्दा बढी रुचाइएको बाइक हो । यसको मूल्य ५ लाख ४८ हजार देखि ६ लाख ४५ हजार रुपैयाँ सम्म छ । त्यसैगरी केही समय पहिले भित्रिएको मेटियर ३५० को मूल्य ६ लाख ६८ हजार देखि ७ लाख १४ हजार सम्म छ । रोयल इन्फिल्ड हिमालयनको मूल्य ८ लाख ९८ हजार र इन्टरसेप्टर ६५० को मूल्य १२ लाख ४९ हजार रुपैयाँ छ ।