एनपीएलको उत्कृष्ट खेलाडीलाई शारडा ग्रुपले ६२ लाख पर्ने ओमोडा ई५ कार उपहार दिने

काठमाडौं – नेपाल क्रिकेट संघ (क्यान) को आयोजनामा मंसिर १५ गतेदेखि सुरु हुने सिद्धार्थ बैंक नेपाल प्रिमियर लिग (एनपीएल) मा उत्कृष्ट प्रदर्शन गर्ने नेपाली खेलाडीलाई शारडा ग्रुपले ६१ लाख ९९ हजार रूपैयाँ मूल्य पर्ने ओमोडा ई५ कार प्रदान गर्ने भएको छ ।

‘प्लेयर अफ द सिरिज’ घोषित हुने नेपाली खेलाडीलाई यो ब्रान्ड न्यु कार प्रदान गरिने नेपालका लागि ओमोडाको आधिकारिक वितरक एसपीजी अटोमोबाइल्सका निर्देशक गौरव शारडाले पुष्टि गरेका छन्। यसअघि पुरस्कारको रूपमा दिइने कारको नाम सार्वजनिक गरिएको थिएन। नेपालमा यसको बजार मूल्य ६१ लाख ९९ हजार रूपैयाँ रहेको छ।

एनपीएलको व्यावसायिक अधिकार व्यवस्थापन गरिरहेको ब्रान्ड डिजिटल लजिक प्रालि र क्यानको सहकार्यमा शारडा ग्रुपसँग सम्झौता भएको हो।

मंसिर १५ देखि पुष ६ सम्म कीर्तिपुरस्थित त्रिभुवन विश्वविद्यालय क्रिकेट मैदानमा हुने सिद्धार्थ बैंक नेपाल प्रिमियर लिगमा शारडा ग्रुप अन्तर्गतको एसपीजी अटोमोबाइल्सको ‘ओमोडा एन्ड जेईको’ ‘ड्रिभन बाई’ सह–प्रायोजकको रूपमा साझेदार रहेको छ।