दुगडले सक्यो रोयल इन्फिल्डको स्टक, स्पेयर पार्ट्सको मौज्दात भने पर्याप्त

रोयल इन्फिल्डको पुरानो बिक्रेता दुगड समुह अन्तर्गतको विवेक अटोमोवाइल्सले आफूसँग भएको सम्पूर्ण स्टक बिक्री गरेको छ । विगत ३ दशकयता रोयल इन्फिल्डको बिक्री वितरण गर्दै आइरहेको यो कम्पनीको डिलरसिप पछिल्लो समय त्रिवेणी समुह अन्तर्गतको अल्फा अटोमोटिभ्सले लिएको छ । यो कम्पनीले केही दिन पहिलेमात्र नयाँ मूल्य सूची सार्वजनिक गरेर मोटरसाइकलको बिक्री औपचारिक रुपमा थालेको थियो ।

विवेक अटोमोवाइल्सले यसअघि बुलेट इलेक्ट्रा, क्लासिक ३५०, मेटियर, इन्टरसेप्टर, थन्डरवर्ड र हिमालयन गरी कुल ६ वटा मोडल आयात गरी कारोबार गर्दै आइरहेको थियो । जसमध्ये सबैभन्दा बढी माग वुलेट इलेक्ट्रा र क्लासिक ३५० को रहँदै आएको थियो । यी बाइक प्रायः सर्टेजको अवस्थामा रहने हुँदा ग्राहकले बुकिङ लिएपछि मात्र हात पार्न सकिने अवस्था रहँदै आएको थियो ।

डिलरसिप परिवर्तन हुने लगभग पक्कापक्की जस्तै भएपछि यसको उत्पादक कम्पनीले केही समय पहिलेदेखि नै दुगडलाई नयाँ बाइक पठाएको थिएन । उक्त समय उसले आफूसँग भएको पुरानो स्टकलाई बिक्री गर्दै आइरहेको थियो । कम्पनी स्रोतका अनुसार अहिले दुगडसँग केही थान मेटियर र इन्टरसेप्टर वाहेक सबै युनिट बिक्री भैसकेको छ । ‘हामीसँग अहिले कुनै पनि स्टक उपलब्ध छैन भन्दा फरक पर्दैन । केही थान भएपनि त्यसलाई कम्पनीमा कार्यरत कर्मचारीहरुले खरिद गर्ने सहमति भैसकेको छ । सरकारले बजेटमा भन्सार र अन्तःशुल्क वृद्धि गरेका कारण ठूलो अन्तरले मूल्य वृद्धि हुने भएपनि हामीले पुरानै मूल्यमा बिक्री गरेका हौ’ उक्त स्रोतले नेपाल अटोसँग भन्यो ।

कम्पनीसँग मोटरसाइकलको स्टक नभएपनि स्पेयर पार्ट्स भने अझै ठूलो परिमाणमा रहेको बताइएको छ । यी स्पेयर पार्ट्सको व्यवस्थापन कसरी गर्ने भनेर कम्पनीले तयारी गरिरहेको उक्त स्रोतको भनाइ छ । ‘बजारमा रोयल इन्फिल्डको जेन्युइन पार्टस्को माग निकै उच्च छ । जसका कारण हामीलाई बिक्री गर्न खासै कठिन हुने देखिरहेका छैनौ । अहिले पनि अधिकांश वर्कशप र स्पेयर पार्ट्स आउटलेटले हामीबाटै खरिद गरिरहेका छन् । हामीले पनि उनीहरुलाई सहुलियत मूल्यमै बिक्री गरिरहेका छौ । अवको केही समयपछि सम्भवतः हामीसँग भएको स्टक क्लियर हुँदै जान्छ’ स्रोतले बताएको छ ।

नयाँ बिक्रेता अल्फा अटोमोटिभले तत्कालका लागि क्लासिक र मेटियर मोडल मात्र उपलब्ध गराउने भन्दै यी बाइकको बिक्री थालिसकेको भएपनि उसले यसअघि बिक्री भएका अन्य मोडलका लागि आवश्यक स्पेयर पार्ट्सको व्यवस्थापन वारेमा भने सार्वजनिक रुपमा केही बताएको छैन । यस्तोमा दुगडसँग भएको स्टकले ग्राहकलाई सहज बनाउने अनुमान गर्न सकिन्छ ।