सेमी कन्डक्टर अभावले टाइगुनको उत्पादनमा असर नगर्ने, मासिक ५ हजार एसयूभी बिक्री गर्ने लक्ष्य

सवारीसाधन उत्पादनमा महत्वपूर्ण भुमिका खेल्ने कम्प्युटरमा आधारित सानो चिप्स अर्थात सेमी कन्डक्टरको अहिले विश्वब्यापी रुपमा अभाव भैरहेको छ । माग बमोजिम आपूर्ति हुन नसकेका कारण विश्वका अधिकांश अटो उत्पादकहरुले आफ्नो उत्पादन नै कम गर्न थालिसकेका छन् ।

विश्वका अन्य राष्ट्रको तुलनामा भारतमा यसको अभाव झनै बढी देखिएको छ । जसका कारण भारतमा महिन्द्रा लगायत कम्पनीहरुले आफ्नो उत्पादन कटौती गर्नुपर्ने बताइसकेका छन् । यस्तोमा विश्वप्रख्यात जर्मन ब्रान्ड फक्सवागनले भने हाल भारतीय बजारमा देखापरेको सेमी कन्डक्टर अभाबले आफ्नो उत्पादन लाइनमा कुनै असर नपुग्ने बताएको छ ।

फक्सवागनले विगत १ बर्षदेखि नै सेमी कन्डक्टर अभावको सामना गर्दै आइरहेपनि भारतमा टाइगुनको उत्पादनमा भने यसले कुनै असर नगर्ने कम्पनीका ब्रान्ड डाइरेक्टर आशिस गुप्ताले बताएका छन् ।

मासिक ५ हजार थान टाइगुन एसयूभी बिक्री गर्ने लक्ष्य लिएको कम्पनीले उक्त लक्ष्य हासिल गर्न सम्पूर्ण तयारी पुरा गरेको उनको दाबी छ । ‘अहिले बजारमा ४० प्रतिशतसम्म सेमी कन्डक्टरको अभाव छ । यसले गर्दा सबैजसो उत्पादक कम्पनीलाई आफ्नो उत्पादन कटौती गर्नुपर्ने अवस्था सिर्जना भएपनि हामीले भने टाइगुनका लागि आवश्यक यस्तो उपकरणको प्रबन्ध मिलाएका छौ’ उनले भने ।

महत्वाकांक्षी योजना सहित भारतीय बजारमा टाइगुन एसयूभी सार्वजनिक गर्न गैरहेका कारण आफूहरुलाई प्रिन्सिपल कम्पनीदेखि विश्वभर छरिएर रहेका अन्य साझेदार कम्पनीहरुले सहयोग गर्ने गुप्ताको दाबी छ । उनका अनुसार फक्सवागन आफैमा एउटा ग्लोबल अर्गनाइजेसन भएका कारण टाइगुनको उत्पादनमा आवश्यक पर्ने यस्ता पार्ट्सको जोहो गर्न सबैले सहयोग गर्नेछ ।

भारतीय बजारम बहुप्रतीक्षित बनेको टाइगुन यही महिनाको २३ तारिखका दिने लन्च हुँदै छ । भारतमा लन्च गरिएलगत्तै नेपाली बजारमा समेत औपचारिक लन्च गर्दै ग्राहकलाई यो एसयूभी डेलिभरी दिने नेपालस्थित बिक्रेता पुजा इन्टरनेसनलले यसअघि नै बताइसकेको छ ।