यी इलेक्ट्रिक कारलाई छोएको छैन बजेटले, पुरानै मूल्यमा खरिद गर्न सकिने

सरकारले बजेटमा १ सय किलोवाट क्षमतासम्मको मोटर जडित इलेक्ट्रिक कारमा पहिलेकै कर संरचनालाई निरन्तरता दिएको छ । यो सेग्मेन्टका कारमा यसअघि १० प्रतिशत भन्सार शुल्क लाग्दै आइरहेकोमा यसलाई नै निरन्तरता दिइएको हो । जसका कारण यो सेग्मेन्टका कारको मूल्यमा कुनै परिवर्तन नहुने देखिएको छ ।

नेपाली बजारमा अहिले १ सय वाट क्षमतासम्मको मोटर जडित चल्तिका इलेक्ट्रिक कार टाटा, बीवाईडी र हुन्डाईसँग मात्र उपलब्ध रहेको छ । त्यसैगरी सीजी मोटर्सले बिक्री शुरु गर्न लागेको नेटा भी पनि यही रेन्जमा पर्ने देखिन्छ । यो गाडीमा ५५ किलोवाट क्षमताको मोटर जडान गरिएको छ । आगामी आइतवार औपचारिक लन्च गर्ने भनिएको यो कारको मूल्य ३८ लाख हाराहारी पर्ने आँकलन गरिएको छ ।

टाटाले बिक्री गर्दै आइरहेको नेक्सन ईभीमा ९५ किलोवाट क्षमताको मोटर जडान गरिएको छ । यो कारको मूल्य अहिले ३७ लाख देखि ४१ लाख रुपैयाँसम्म निर्धारण गरिएको छ । त्यसैगरी टिगोर ईभीमा ५५ किलोवाट क्षमताको मोटर जडान गरिएको छ र यो कारको मूल्य ३० लाख देखी ३३ लाख रुपैयाँसम्म पर्छ ।

बीवाईडीले बिक्री गर्दै आइरहेको नयाँ ई६ मोडलमा ७० किलोवाट आवर क्षमताको मोटर जडान गरिएको छ । यो कारलाई ५७ लाख ५० हजार रुपैयाँमा बिक्री गरिँदै आएको छ । यसैगरी हुन्डाई कोनाको एउटा भेरिएन्टमा १ सय किलोवाट क्षमताको मोटर जडान भएको छ । यो कारलाई ५७ लाख ९६ हजार रुपैयाँमा बिक्री गरिँदै आएको छ । बीवाईडीले नेपाल ल्याउने तयारी थालेको एटो३ मा भने ३० प्रतिशत अन्तःशुल्क र १५ प्रतिशत भन्सार दर बढ्ने देखिएको छ । यो गाडीमा १५० किलोवाट क्षमताको मोटर जडान गरिएको छ ।

यी वाहेक दिगो ई८ र सिटी स्प्रिटमा १५ किलोवाट क्षमताको मोटर जडान गरिएको छ । यी कारको मूल्य क्रमशः २२ लाख र १९ लाख रुपैयाँसम्म तकिएको छ । यी कारलाई पनि बजेटमा थप भएको करले असर गर्नेछैन ।