विद्युतीय सवारी साधन किन्न ९.९९ प्रतिशत दरमा एनएमबि बैंकको कर्जा

काठमाडौं – एनएमबि बैंकले विद्युतीय सवारी साधन किन्न चाहने ग्राहकहरुलाई लक्ष्यित गरी ‘एनएमबि विद्युतीय सवारी कर्जा’ योजना ल्याएको छ । यस अन्तर्गत एनएमबि बैंकले ९.९९ प्रतिशत ब्याजदरमा कर्जा उपलब्ध गराउने छ ।

एनएमबि बैंकको यो योजना सम्भवतः सबैभन्दा सस्तो ब्याजदर भएको बताइएको छ । विद्युतीय सवारी साधनका लागि ८० प्रतिशत सम्म कर्जा उपलब्ध गराउन सकिने सरकारी नीति अनुसार नै बैंकले कर्जा सुविधा उपलब्ध गराउने बताएको छ ।

७ वर्ष सम्मका लागि उपलब्ध गराउने उक्त कर्जा योजना अन्तर्गत कर्जा प्रशासनिक शुल्कमा समेत ०.२५ प्रतिशत छुट उपलब्ध गराउने बैंकको भनाइ छ ।

एनएमबि बैंकले भृकुटीमण्डपमा जारी हिमालयन हाइड्रो एक्सपोमा अवस्थित स्टलमार्फत सो कर्जा सम्बन्धी जानकारी प्रदान गरिरहेको छ ।

विद्युतीय सवारी साधन किन्ने ग्राहकलाई लक्ष्यित गर्दै बैंकले पहिले देखि नै आकर्षक स्किम उपलब्ध गराउदै आएको छ ।