१० हजार छुटमा याडियाका दुई स्कुटर, यस्तो छ मूल्य र पर्फमेन्स

काठमाडौं– इलेक्ट्रिक स्कुटर याडियाको नेपालका लागि आधिकारिक वितरक कुजु नेपालले अंग्रेजी नयाँ वर्ष–२०२४ को अवसरमा नगद छुट अफर ल्याएको छ । उक्त अफर अन्तर्गत याडियाका दुई मोडल एम६ र ई८एस प्रोमाको खरिदमा ग्राहकले १० हजार नगद छुट पाउनेछन् ।

१ लाख ७५ हजार र २ लाख ३० हजार रुपैयाँमा बिक्री हुँदै आएका यी स्कुटरमा १० हजार छुट दिएर १ लाख ६५ हजार र २ लाख २० हजारमा बिक्री गरिने कम्पनीले जनाएको छ । चिनियाँ ईभी निर्माता याडिया इलेक्ट्रिक टु–ह्विलरमा विश्वासिलो र प्रिमियम ब्रान्ड मानिन्छ ।

कम्पनीले बिक्री गर्दै आएको ई८ एस प्रोमा ३८ एम्पियर आवरको ग्राफिन ब्याट्री र २.८ किलोवाट क्षमताको मोटर जडान गरिएको छ । ६० किलोमिटर प्रतिघण्टाको उच्च गतिमा हाँक्न सकिने यो स्कुटरले सिंगल चार्जमा १२० किलोमिटर रेन्ज दिने दावी गरिएको छ । यसको दुवै चक्कामा डिस्क ब्रेक दिइएको छ ।

त्यसैगरी सस्तो मोडल एम६ मा २६ एम्पियर आवरको ग्राफिन ब्याट्री र २.१ किलोवाट क्षमताको मोटर जडान गरिएको छ । यो स्कुटरलाई ४५ किलोमिटर प्रतिघन्टाको उच्च गतिमा हाँक्न सकिन्छ भने रेन्ज ९० किलोमिटर रहेको छ । यसको अगाडी डिस्क र पछाडी ड्रम ब्रेक पाउन सकिन्छ ।