जेठ देखि नयाँ लाइसेन्सको आवेदन खुल्ने, नवीकरण गर्नेले समेत एक महिनामै पाउने

काठमाडौं – आगामी जेठ १ गते पश्चात सवारी लाइसेन्स सहज तरिकाले पाइने भएको छ । यातायात व्यवस्था विभागका महानिर्देशक नमराज घिमिरेले एक वर्षको प्रगति विवरण सार्वजनिक गर्दै यो जानकारी दिएका छन् ।

महानिर्देशक घिमिरेका अनुसार जेठ पछि लाइसेन्स नवीकरण गर्नेहरुले समेत एक महिनामै नयाँ लाइसेन्स पाउने छन् । त्यसपछि शुल्क तिर्नेहरुका लागि घरैमा लाइसेन्स डेलिभरी दिनका लागि समेत तयारी भइरहेको छ । उनका अनुसार सन् २०२१ को करिब २ लाख ८ हजार र सन् २०२२ लागे यताको करिब १ लाख लाइसेन्स छपाइको काम छ ।

हाल ट्रायलमा पास भएर नयाँ लाइसेन्स बनाउनेहरुका लागि एक वर्षको परीक्षणकालीन लाइसेन्स जारी भइरहेको छ । उनका अनुसार जेठदेखि नयाँ सवारीको लाइसेन्सको आवेदन पनि खुल्नेछ । जेठसम्म फारम भरिसकेका ५ लाख ७२ हजार सोवग्राहीसँग परीक्षा लिइसक्ने बताउँदै घिमिरेले त्यसपछि फारम भरेको १५ दिनभित्रै परीक्षा दिन पाउने व्यवस्था गरिने बताए ।

हाल दैनिक ६ हजार जना मात्रै परीक्षामा सहभागी भइरहेको र अब क्षमता बढाएर १५ हजार बनाउने तथा ‘त्यसपछि एउटा नागरिकता नम्बर भएका व्यक्तिले एकपटक मात्रै अनलाइन आवेदन भनसक्ने बनाएर बिचौलिया समेत रोकिने उनको दाबी छ । उनका अनुसार ‘आवेदन प्रणालीमा देशभरका जुनसुकै यातायात कार्यालयमा १५ दिनभित्र उपलब्ध रिक्त सिट आवेदकले हेर्न पाउने र आफ्नो पायक पर्ने कार्यालयमा आवेदन दिएर तुरुन्तै अनलाइनबाट शुल्क भुक्तानी गर्न सक्ने व्यवस्था गरिने छ ।

विभागले केही दिन पहिले देखि अर्को सूचना जारी नभए सम्मका लागि नयाँ लाइसेन्सको अनलाइन आवेदन नै बन्द गरेको छ ।