पेट्रोल कारमा ४ ब्रान्डको नयाँ स्किम, ईभीमा जस्तै इन्धन बचत र सरल फाइनान्सको सुबिधा

काठमाडौं– बजारमा अहिले इलेक्ट्रिक कारले एकछत्र बजार लिइरहेको छ । ईभीको बढ्दो चर्चाले गुमनाम जस्तै बनेका पेट्रोल कार नयाँ र आकर्षक स्किम सहित बजारमा पुनरागमन गर्न पहल गर्दैछन् । यहि मेसोमा केही ब्रान्डले ग्राहक तान्न निकै आकर्षक स्किम समेत ल्याएको छन् । ईभी किनेकै फिल दिने गरी कम्पनीले आकर्षक अफर ल्याएका हुन् ।

बिक्रेता कम्पनीले ईभीमा जस्तै इन्धनमा खर्च हुने रकमलाई वचत गर्न सकिने र फाइनान्समा कम दरको ब्याजदरका साथै ८० प्रतिशतसम्म फाइनान्सको स्किम ल्याएका छन् । केही समयअघि फोर्डले १० वर्षसम्म निशुल्क पेट्रोल दिने स्किम लन्च गरेपछि निसान, हुन्डाई र सिट्रोनले पनि आफ्नो कार खरिद गर्ने ग्राहकलाई लक्षित गरी नयाँ स्किम ल्याएका हुन् ।

निसान ब्रान्डको किक्स र म्याग्नाइट एसयूभी खरिद गर्दा ग्राहकले ५ र ४ वर्षसम्म निशुल्क पेट्रोल पाउनेछन् । यसमार्फत ग्राहकले सो अवधी सम्मका लागि ‘फ्रि रनिङ कष्ट’ सहित महत्वपूर्ण बचतको मज्जा लिन सक्ने कम्पनीले जनाएको छ । निशान गाडी पायोनियोर मोटो कर्पले बिक्री गर्दै आएको छ । १६ वटा भेरिएन्टमा उपलब्ध म्याग्नाइटको मूल्य ३४ लाखदेखी ४८ लाख ८४ हजार रुपैयाँसम्म पर्छ भने किक्सको मूल्य ४९ लाख ९९ हजार रुपैयाँ देखि प्रारम्भ हुन्छ ।

फ्रेन्च ब्रान्ड सिट्रोनको सी३ एसयूभी खरिद गर्दा ग्राहकले ईभीमा जस्तै ८० प्रतिशतसम्म फाइनान्स सुबिधा पाउने भएका छन् । सिट्रोन गाडीको बिक्रेता सांग्रिला मोटर्सले २० प्रतिशत डाउनपेमेन्टमै सी३ कार खरिद गर्न सकिने स्किम ल्याएको हो । एउटामात्रै भेरिएन्टमा उपलब्ध सी३ को मूल्य ३६ लाख ५० हजार निर्धारण गरिएको छ । जसअनुसार यो गाडी खरिद गर्दा ग्राहकले शुरुमा ७ लाख २० हजार भुक्तानी गरे पुग्छ ।

हुन्डाई गाडीको बिक्रेता लक्ष्मी इन्टरकन्टिनेन्टल प्रालिले नेपालमै एसेम्वल भएको भेन्यू एसयूभीमा ६.९९ प्रतिशत ब्याजदरको स्किम ल्याएको छ । एकदमै सस्तो ब्याजदरको यो स्किमले ग्राहकलाई ईभी छाडेर भेन्यू एसयूभीमा आकर्षित गर्ने देखिन्छ ।

यसका साथै कम्पनीले १० वर्षको निशुल्क सर्भिसिङ र ३ वर्षको वारेन्टि समेत दिने जनाएको छ । नेपालमा बनेको भेन्यू एस र एसएक्स गरी जम्मा दुई भेरिएन्टमा उपलब्ध छ । जसको मूल्य क्रमशः ४४ लाख ९६ हजार र ५३ लाख ५६ हजार निर्धारण गरिएको छ ।