नयाँ मोडलको इलेक्ट्रिक स्कुटर ‘इपक’ भित्र्याउँदै याडिया नेपाल

काठमाडौं – नेपाली बजारमा याडियाका इलेक्ट्रिक स्कुटर बिक्री–वितरण गरिरहेको कुजु नेपाल प्रालिले नयाँ मोडल ‘इपक’ भित्र्याउने भएको छ । नेपाली बजारमा पहिले नै दुई मोडल जी६ र एम६ बिक्री–वितरण गरिरहेको कुजु नेपालले अब अर्को मोडल भित्र्याउने भएको हो ।

भन्सार प्रयोजनका लागि मूल्य सूची सार्वजनिक गरिए अनुसार सो इपक मोडलको मूल्य २ लाख ३५ हजार रुपैयाँ हुनेछ । ३ हजार वाट मोटर क्षमता भएको सो स्कुटरले सिंगल चार्जमा १५० किलोमिटर सम्म रेन्ज दिन्छ ।

१६ डिग्रीको उकालो चढ्न सक्ने र याडिया मोबाइल एप प्रयोग गरी विभिन्न फिचर प्रयोग गर्न सकिने सो स्कुटरको अन्य फिचर भने हाल सार्वजनिक गरिएको छैन ।

केही समय पश्चात सो स्कुटर नेपाली बजारमा उपलब्ध हुने र यसका अन्य फिचर समेत त्यही समयमा सार्वजनिक गर्ने कम्पनी स्रोतको भनाइ छ ।

हाल नेपाली बजारमा उपलब्ध याडिया जी६ र एम६ को मूल्य क्रमशः २ लाख ६० हजार र १ लाख ७५ हजार रुपैयाँ छ ।

चीनमा उत्पादन हुने युरोपेली स्ट्यान्डर्डका याडिया इलेक्ट्रिक स्कुटर विश्वका १०० भन्दा धेरै देशमा विक्री हुँदै आएका छन् भने विगत ७ वर्ष देखि लगातार धेरै बिक्री हुने इलेक्ट्रिक स्कुटर बिक्री गर्ने कम्पनी समेत भएको दावी गरिएको छ ।