थप फिचरले भरिपूर्ण फर्चुनरको अपडेटेड नयाँ मोडल लन्च

टोयोटा मोटरले फेसलिफ्ट एसयूभी फर्चुनरको नयाँ लिडर भेरिएन्ट लन्च गरेको छ । सो एसयूभीमा हालको मोडलको तुलनामा धेरै अपडेट र अतिरिक्त फिचर थप गरिएको छ । अपडेट गरिएको एक्सटेरियर डिजाइन, क्याबिन र नयाँ सेफ्टी फिचरले सो एसयूभीलाई अन्य भेरिएन्ट भन्दा बढी प्रिमियम बनाएको छ । नयाँ भेरिएन्ट हालै थाइल्याण्डमा लन्च गरिएको छ ।

नयाँ टोयोटा फर्चुनरको एक्सटेरियरमा नयाँ फ्रन्ट र रियर बम्पर, ब्ल्याक रियर डोर ट्रिम, ब्ल्याक साइड स्टेप्स, नयाँ १८ इन्च अलोय ह्विल समावेश गरिएको छ । साथै यसमा एलईडी हेडलाइट युनिट फलो–मी–होम, अटोमेटिक हाई–लो बीम एड्जस्टमेन्ट फिचरको साथै अटोमेटिक अन–अफ कन्ट्रोल पनि प्रदान गरिएको छ ।

सो एसयूभीको क्याबिनमा अटोमेटिक क्लाइमेट कन्ट्रोल सिस्टम र पीएम २.५ एयर कन्डिसनिङ फिल्टर, ८ इन्चको टचस्क्रिन इन्फोटेनमेन्ट डिस्प्ले समावेश गरिएको छ, जसले एप्पल कारप्ले र एन्ड्रोइड अटो, टोयोटा कनेक्ट कनेक्टिभिटी सिस्टम, प्याडल शिफ्टरलाई सपोर्ट गर्छ ।

टोयोटा फर्चुनरमा ब्लाइन्ड स्पट मोनिटरिङ, रियर क्रस ट्राफिक अलर्ट र ६ पोजिसन पार्किङ सेन्सर, ३६० डिग्री क्यामेरा, ब्रेक असिस्ट र हिल स्टार्ट असिस्ट जस्ता फिचर समावेश छ । फर्चुनर एसयूभी ६ रङमा उपलब्ध छ ।

नयाँ टोयोटा फर्चुनरमा २.४ लिटर ४ सिलिन्डर डिजेल इन्जिन समावेश छ, जसले ३४०० आरपीएममा १५० हर्सपावर र १६०० – २००० आरपीएममा ४०० एनएमको टर्क जेनेरेट गर्छ । सो इन्जिन ६ स्पिड अटोमेटिक ट्रान्समिसनसँग जोडिएको छ । सो एसयूभी टु ह्विल र फोर ह्विल दुवै विकल्पमा उपलब्ध छ ।