टोयोटाले सुजुकीसँगको सहकार्यमा ल्यायो नयाँ हाइब्रिड एसयूभी

टोयोटाले भारतमा नयाँ मिड साइज एसयूभी हाइराइडर सार्वजनिक गरेको छ । पुरै हाइब्रिड मोडलको रुपमा सार्वजनिक गरिएको हाइराइडरको बुकिङ समेत खुला गरिएको छ । हाइब्रिड मोडल भएकैले यसको नाम पनि हाइराइडर राखिएको बताइएको छ ।

हाल टोयोटा र सुजुकीको सहकार्यमा सवारी साधन निर्माणको क्रम चलिरहेको छ । यो यसरी सहकार्यमार्फत उत्पादन गरिएको तेस्रो कार हो । टोयोटा हाइराइडरले किया सेल्टोस, स्कोडा कुशाक र हुन्डाई क्रेटासँग प्रतिस्पर्धा गर्नेछ ।

टोयोटा हाइराइडरमा मारुतीको १.५ लिटर के१५सी पेट्रोल इन्जिनका साथ सुरुवाती भेरिएन्टमा माइल्ड हाइब्रिड र माथिल्लो भेरिएन्टमा मजबुत हाइब्रिड सिस्टम उपलब्ध हुनेछ । यसको माइल्ड हाइब्रिड भर्सनले १०३ बीएचपी पावर र १३७ एनएम टर्क तथा मजबुत हाइब्रिड सेटअपले ११६ बीएचपीको पावर दिन्छ ।

२०२२ टोयोटा अर्वन क्रुजर हाइराइडर एक सेल्फ चार्जिङ स्ट्रोङ हाइब्रिड इन्जिनयुक्त हुनेछ । त्यसैगरी यसमा नियो ड्राइभको रुपमा दोस्रो इन्जिन अप्सन हुनेछ ।

हाइब्रिड मोडलमा अल ह्विल ड्राइभ पावरट्रेन, प्यानोरामिक सनरुफ, हेड्स अप डिस्प्ले, वायरलेस चार्जर, ३६० डिग्री क्यामेरा, ९ इन्चको स्मार्टप्ले कास्ट र ५५ भन्दा धेरै कनेक्टेड फिचर जस्ता सेगमेन्ट फर्स्ट फिचर हुनेछन् ।

यो गाडीको फ्रन्ट प्रोफाइललाई क्रोम गार्निसिङका साथ प्रिमियम लुक दिइएको छ । हेडल्याम्पका साथ स्ट्रिप्ड एलईडी डे टाइम रनिङ लाइट छ भने पियानो ब्ल्याक ग्रिलले हेडल्याम्पलाई जोड्छ । यसमा भएको ठूलो एयरड्यामले एसयूभीको बोल्डनेसलाई बढाएको छ ।