लामो र नयाँ डिजाइन सहितको नयाँ अल्टो अर्को महिना लन्च हुने

मारुती सुजुकीले अल्टोको नेक्स्ट जेनेरेसन मोडल अगस्टको दोस्रो हप्ता लन्च गर्ने तयारी गरिरहेको छ । नेक्स्ट–जेनेरेसन मोडेल परीक्षणको समयमा धेरै पटक देखिएको थियो ।

सुजुकीको सो नयाँ मोडल नयाँ प्लेटफर्ममा निर्माण हुनेछ । सुजुकीले आफ्नो मोड्युलर हार्टेक्ट प्लेटफर्ममा सो कार निर्माण गर्ने सम्भावना छ । नेक्स्ट जेनेरेसन मोडल अल्टोमा नयाँ नयाँ डिजाइन र बडी शेल हुनेछ भने कारको ह्याचब्याक लुकलाई कायम राखिनेछ । यसको डिजाइन सेलेरियो जस्तै हुने सम्भावना छ ।

नयाँ अल्टोको स्टाइल शार्प गरिएको छ, जसमा हेडल्याम्प माथितिर ढल्किएको छ र फगल्याम्प आकर्षक बनाइएको छ । नयाँ अल्टो हालको मोडलको तुलनामा अलि लामो हुन सक्छ र ढोका पनि अलि ठूलो हुन सक्छ । यद्यपि, टायरको साइज सबै भेरिएन्टका लागि समान रहने अपेक्षा गरिएको छ । टेलगेटको डिजाइन सीधा हुन सक्छ र टेलल्याम्प शेड सेलेरियोको जस्तै हुन सक्छ ।

नेक्स्ट जेनेरेसन अल्टोमा नयाँ के१०सी १.० लिटर ड्युअलजेट पेट्रोल इन्जिन जडान गरिनेछ । सो इन्जिनले ६७ एचपी पावर र ८९ एनएम टर्क जेनेरेट गर्छ । मारुती सुजुकीले नयाँ अल्टो २ इन्जिनको विकल्पमा लन्च गर्ने सम्भावना छ । नयाँ अल्टो सीएनजी भेरिएन्ट पनि लन्च हुने अपेक्षा गरिएको छ ।