यी नयाँ फिचरले वनाएको छ भेन्यु फेसलिफ्टलाई थप आकर्षक र सुविधा सम्पन्न

लामो समयको प्रतिक्षासंगै हुन्डाईले अन्तत नेपाली बजारमा नयाँ भेन्यु लन्च गरेको छ । सव कम्प्याक्ट एसयूभी सेग्मेन्टमा सफल मोडल सावित भइसकेको यो नयाँ एसयूभीमा कम्पनीले थुप्रै फिचर अपडेट गरेर ल्याएको हो ।

यो नयाँ मोडलको एक्सटेरियर र इन्टेरियर दुवै भागमा हुन्डाईले व्यापक परिमार्जन गरेको छ । यसको फ्रन्ट फेसियामा स्प्लिट हेडल्याम्प सेटअप, नयाँ डिजाइनको एलइडी डिआरएल र टर्न इन्डिकेटर पाउन सकिन्छ । यसैगरी पारामेट्रिक डार्क क्रोम ग्रिल, नयाँ वम्पर, नयाँ अलोय ह्विल र स्किड प्लेट डिजाइनले नयाँ भेन्युलाई थप स्पोर्टी देखाउन मद्धत गरेको छ ।

यसको क्याविन भित्र पनि प्रशस्तै अपग्रेड गरिएको छ । यो नयाँ एसयूभीमा पहिलोपटक पूर्ण डिजिटल इन्स्ट्रयूमेन्ट क्लस्टर दिइएको छ भने ड्राइभलाई थप रोमाञ्चक बनाउन स्पोर्टस, नर्मल र इको ड्राइभिङ मोड दिइएको छ । यसको ड्राइभर सिटलाई इलेक्ट्रोनिकल्लि एडजस्ट गर्न मिल्छ । साथै क्याविनको धेरै भागमा रिफ्रेस गरिएको छ ।

नयाँ भेन्यु फराकिलो बनावट र टु टोन ब्ल्याक ग्रेज इन्टेरियरका कारण आरामदायी छ । यसमा फराकिलो बुट स्पेस सहितको स्प्लिट सिट, कप होल्डर सहितको रियर सेन्टर आर्मरेस्ट, दुई वटा रियर युएसबी चार्जर, टु स्टेप रियर रिक्लाइनिङ सिट, एर्गोनोमिकल्ली डिजाइन गरिएको सुविधाजनक चालक सिट, ८ इन्चको इन्फोटेनमेन्ट सिस्टम, कुल्ड ग्लोभ बक्स,वायरलेस फोन चार्जर, डुअल टोन क्लाइमेट कन्ट्रोल एसी र स्मार्ट सनरूफ लगायतका सुविधा छन् ।

यसमा अमेजन एलेक्सा र गुगल भ्वाइस एसिस्ट सहितको ‘होम टु कार कनेक्टिभिटी’ फिचर थप गरिएको छ । यसैगरी कन्ट्रोल सेलेक्ट कार फिचर, रिमोट क्लाइमेट कन्ट्रोल, रिमोट डोर लक र अनलक फिचर, रिमोट भेहिकल स्टाटस चेक, फाइन्ड माइ कार, टायर प्रेसर इन्फर्मेसन, फ्यूल लेभल इन्फर्मेसन, स्पीड अलर्ट, टाइम फेन्सीङ अलर्ट, आइडल टाइम अलर्ट जस्ता फिचर थप भएको छ ।

यसमा एम्बिएन्ट साउन्ड्स अफ नेचरका रूपमा नयाँ अडियो फिचर पनि समावेश गरिएको छ । त्यस्तै ६ वटासम्म एयर व्याग, रियर पार्किङ असिस्ट क्यामरा, अटोमेटिक हेडल्याम्प र हेडल्याम्प इस्कर्ट फङसन, कर्नरिङ ल्याम्प्स, टायर प्रेसर मनिटरिङ सिस्टम, इलेक्ट्रोनिक स्टेबिलिटी कन्ट्रोल, भेइकल स्टेबिलिटी म्यानेजमेन्ट र हिल असिस्ट कन्ट्रोल लगायत थप सेफ्टि फिचर पाउन सकिन्छ ।

१.० टर्वो पेट्रोल र १.४ डिजेल इन्जिन अप्सनमा समेत उपलब्ध भएपनि नेपाली बजारमा भने यसको १.२ लिटर नेचुरल्ली एस्पिरेटेड इन्जिन मात्र उपलब्ध गराइएको छ । जसको अधिकतम पावर ८३ पिएस र टर्क ११४ एनएम रहेको छ । यो नयाँ एसयूभी ई, एस र एसएक्स गरी कुल तीन भेरिएन्टमा नेपाल आएको हो । जसको मूल्य क्रमश ३९ लाख ९६ हजार, ४५ लाख ९६ हजार र ५५ लाख ९६ हजार निर्धारण गरिएको छ ।