महानगर यातायातको सेवा विस्तार, काठमाडौंमा अब थप १६ नयाँ विद्युतीय बस सञ्चालनमा

काठमाडौं – महानगर यातायात प्रालिले थप १६ नयाँ विद्युतीय बसहरुमार्फत काठमाडौंको चक्रपथमा सेवा विस्तार गरेको छ । ३३ सिट क्षमता भएको नयाँ विद्युतीय बस उभिएर यात्रा गर्ने यात्रुहरुका लागि पनि सहज डिजाइन गरिएको छ । उक्त वसहरुमा एकै पटक ७० हाराहारी यात्रुले सहजै यात्रा गर्न सक्नेछन् ।

शशिला मोटर्स प्रालिले चिनबाट आयात गरेको उक्त बसमा १ सय ४४ किलोवाट क्षमताको सीएटीएल ब्याट्री प्रयोग भएको छ भने एक पटकको फूल चार्जमा २ सय किलोमिटर यात्रा तय गर्न सक्छ । उक्त वसको बजार मूल्य १ करोड ३१ लाख ९० हजार रहेको छ । अत्याधुनिक र सुविधासम्पन्न बसमा आरामदायी सिट र यात्रु सुरक्षाका हरेक प्रबन्ध मिलाइएको छ ।

नयाँ बसहरुको सेवा शुभारम्भ कार्यक्रममा महानगर यातायात प्रालिका सचिव केशव नेपालले अबका दिनमा विद्युतीय सवारी साधनको विकल्प नभएको भन्दै महानगर यातायातले यो सेवालाई थप विस्तार गर्दै लैजाने जानकारी दिए । सुरुवाती लगानी ठूलो भए पनि व्यावसायिक दृष्टिकोंणले विद्युतीय वसहरु उपयुक्त भएको उनको भनाइ छ । सचिव नेपालले व्यवसायीका लागि आय आर्जनका हिसावमा राम्रो देखिएको भन्दै अन्य यातायात व्यवसायीलाई समेत विद्युतीय वस संचालनमा जान सुझाव दिएका छन् । सरकारले पछिल्लो समय ५० युनिट भन्दा वढी विद्युत खपतमा लगाएको कर विद्युतीय सवारी साधन संचालकका लागि छुट दिन उनले सरकारको ध्यानाकर्षण पनि गराएका छन् ।

महानगर यातायात प्रालिका संचालक समिति सदस्य धर्मराज रिमालले यसअघि १२ वटा विद्युतीय बसको सफल संचालनपछि पुनः वसहरु थपिएको जानकारी दिएका छन् । विद्युतीय बसहरु संचालन खर्च र प्राविधिक सरलताका कारण झन्झट विना चल्ने भएकाले डिजेल वसभन्दा झण्डै चार गुणा आम्दानी गरिरहेको पनि उनले जानकारी दिए । शशिला मोटर्सबाट उपलब्ध हुने विक्रीपछिको सेवा गुणस्तरीय, प्रभावकारी र चुस्त भएकाले शशिलासँग सहकार्य गर्दा आफूहरु खुसी रहेको उनले बताए ।

महानगर यातायात प्रालिलाई बसको चावी हस्तान्तरण गर्दै शशिला मोटर्सका प्रबन्ध निर्देशक सन्तोष खतिवडाले अवको आवश्यकता ठूला आकारका विद्युतीय बसहरुको प्रवद्र्धन नै भएको बताए । खतिवडाले यी बसहरु ब्यवसायी र यात्रुको लागि मात्रै नभएर देशकै आवश्यकता भएको पनि बताएका छन् ।

शशिला मोटर्स विश्वका उत्कृष्ट ब्रान्डका सबै खाले व्यावसायिक विद्युतीय सवारी साधनलाई नेपालमा स्थापित गर्ने लक्ष्यका साथ नेपालको कमर्सियल ईभी क्रान्तिको नेतृत्व गर्दै अघि वढिरहेको उनको भनाइ छ । गाडी विक्री गर्ने मात्रै नभएर आफ्टर सेल्स इकोसिस्टमलाई प्राथमिकतामा राखेर शशिला मोटर्स अघि वढिरहेको उनले प्रष्ट पारे ।

काठमाडौं उपत्यका र बाहिर समेत १ सय ४० बढी गाडी मार्फत सेवा दिइरहेको महानगर यातायात प्रालिले २८ वटा सिटी बस र २४ वटा माइक्रो बस गरी ५२ वटा विद्युतीय सवारी संचालन गरिरहेको छ ।