इलेक्ट्रिक माइक्रोबसमा अर्को प्रतिस्पर्धी थपिदै, विशाल ग्रुपले ल्याउदै ११ सिटर भ्यान

काठमाडौं – नेपाली बजारमा इलेक्ट्रिक माइक्रोबसको प्रयोग बढ्दै गएको सन्दर्भमा नयाँ ब्रान्ड थपिने भएको छ । विशाल ग्रुप अन्तर्गतको पूजा कन्स्ट्रक्सनले नयाँ ११ सिटर इलेक्ट्रिक माइक्रोबस ल्याउने भएको छ ।

एसआरएमको एक्स३०एल मोडलको सो भ्यान हाल परीक्षण भइरहेको छ । यसले सिंगल चार्जमा ३०० किलोमिटरको रेन्ज दिने कम्पनीको भनाइ छ । यसमा भएको सीएटीएलको लिथियम आइरन फस्फेट ब्याट्रीलाई फास्ट चार्जरको सहयोगले ४५ मिनेटमै फुल चार्ज गर्न सकिने छ । सामान्य अवस्थामा भने फुल चार्ज गर्न करिव १२ घण्टा जति लाग्ने छ ।

५ वर्ष वा २ लाख किलोमिटर गुड्दा सम्म ब्याट्रीमा वारेन्टी उपलब्ध हुने कम्पनीको भनाइ छ ।

४४ लाख ५० हजार रुपैयाँ मूल्य तोकिएको सो इलेक्ट्रिक भ्यानका लागि हाल डिलर आह्वान समेत गरिएको छ ।

यसमा विभिन्न अत्याधुनिक फिचर समेत रहेका छन् । हाल विशेष गरी काठमाडौंबाट पूर्व क्षेत्रतिरका रुटहरुमा यस्ता माइक्रो भ्यान लोकप्रिय बनिरहेका छन् ।

एक्स३०एल ईभी विश्व बजारमा अन्य ब्रान्डमा समेत देख्न सकिन्छ । ब्रिलेन्स अटोद्वारा उत्पादन गरिने सो भ्यान एसआरएम साइनरी एक्स३०एल, डोङफेङ ईएम१३ लगायतका विभिन्न नाममा समेत आउने विकिपिडियाले उल्लेख गरेको छ । यी मोडल कुनै समय नेपाली बजारमा दिगो र सीजी मोटर्सले ल्याउने चर्चा समेत चलेको थियो । यद्यपि पछि यी कम्पनीले यो मोडल नल्याउने निर्णय गरेका थिए ।