भारतीय प्रधानमन्त्री मोदीको नयाँ कार : १२ करोड भारुको मर्सिडिज मेब्याक एस ६५० गार्ड

भारतीय प्रधानमन्त्री नरेन्द्र मोदी हालै दिल्लीको हैदरावाद हाउसमा नयाँ मर्सिडिज मेब्याक एस ६५० गार्डमा देखिएका थिए । रुसी राष्ट्रपति भ्लादिमिर पुटिनलाई स्वागत गर्न उनी नयाँ कारमा देखिएका थिए । नयाँ मर्सिडिज मेब्याक ६५० लाई प्रधानमन्त्रीको नयाँ कारको रूपमा नाम दिइएको छ । मेब्याक एस ६५० गार्डमा प्रधानमन्त्रीको सुरक्षाका लागि बीआर१० लेवलको सुरक्षा फिचर समावेश गरिएको छ ।

मर्सिडिज मेब्याक एस ६५० संसारको सबैभन्दा सुरक्षित कार मध्ये एक हो । यो कारले एके–४७ राइफलको आक्रमणलाई पनि सामना गर्न सक्छ । साथै यो कारले १५ किलो टीएनटीको विस्फोटलाई पनि सहन सक्ने क्षमता रहेको छ । यसलाई बुलेटप्रुफ बनाउन यसको झ्यालमा पोली कार्बोनेट लेप लगाइएको छ ।

कारलाई बाहिरबाट मात्र नभई भित्रबाट पनि बुलेटप्रुफ गरिएको छ जसले गर्दा कुनै क्षति हुने सम्भावना छैन । विषाक्त ग्याँसको आक्रमणबाट बच्न कारको क्याबिनमा छुट्टै भेन्टिलेसन सिस्टमको व्यवस्था गरिएको छ ।

सो कारमा ६.० लिटर ट्वीन–टर्बो भी१२ इन्जिन दिइएको छ जसले ५१६ बीएचपीको पावर र ९०० एनएमको टर्क जेनेरेट गर्छ । कारमा विशेष रन फ्ल्याट टायरहरू पनि जडान गरिएको छ । जसले क्षति वा पन्चरको अवस्थामा पनि काम गर्छ ।

सो लक्जरी कारमा यात्रुको सुविधाको पनि ख्याल गरिएको छ । कारमा अटोमेटिक मसाज सिट जडान गरिएको छ । सिटहरू अगाडि पछाडि सारेर लेगरुमलाई आराम गर्न सकिन्छ ।

नयाँ कारको लागि विशेष सुरक्षा एक स्पेसन प्रोटेक्सन समूह वा एसपीजीद्वारा गरिन्छ । एसपीजीले सुरक्षा आवश्यकताहरू पहिचान गर्छ र त्यसपछि प्रधानमन्त्रीलाई नयाँ गाडी चाहिन्छ वा छैन भन्ने निर्णय गर्छ । एसपीजीले दुई समान कारलाई अर्डर दिन्छ । प्रत्येक गाडीको मूल्य करिब १२ करोड भारु पर्छ ।

प्रधानमन्त्री नरेन्द्र मोदीले आफ्नो राजनीतिक यात्रामा धेरै बुलेटप्रुफ गाडीको प्रयोग गरेका छन् । गुजरातको मुख्यमन्त्री हुँदा मोदीले बुलेटप्रुफ महिन्द्राको स्कोर्पियो प्रयोग गर्थे । त्यसपछि उनले आधिकारिक वाहनको रुपमा ल्यान्डरोभर रेन्जरोभर भोग र टोयोटा ल्यान्डक्रुजर समेत प्रयोग गरेका छन् ।