नेपाल आउँदै गरेको एलईभी–एक्स चीनमा तयार, यस्तो छ विशेषता

काठमाडौं–चिनियाँ ईभी ब्रान्ड एलएस अटोले आफ्नो पहिलो मोडल ‘एलईभी–०१ को अल ह्वील ड्राइभ मोडल तयार पारेको छ । एलईभी–एक्स नाममा नेपाली बजारमा आउने तयारीमा रहेको यस ईभीलाई आगामी नाईमा नेपाल मोविलिटी एक्सपोमा लन्च गरिने एलएस अटोको नेपालका लागि आधिकारिक वितरक नेक्सन भेन्चर प्रालिले बताएको छ

नयाँ अल ह्वील ड्राइभ मोडल अहिले बजारमा रहेको एलईभी–०१ कै बडी डिजाइनमा आउने छ । बाहिरबाट हेर्दा उस्तै देखिएपनि भित्री फिचर भने फरक हुने कम्पनीको भनाइ छ ।

कम्पनीका अनुसार एलईभी–एक्समा फ्रन्ट र रियरमा गरी १९८ किलोवाटको ड्यूल मोटर सेटअप रहेको छ । साथै, ब्याट्री पनि १० किलोवाट आवर बढी क्षमताको प्रयोग भएको छ । एलईभी–०१ मा ६७ किलोवाट आवरको ब्याट्री रहेकोमा एक्स मोडलमा ७७ किलोवाट अवारको ब्याट्री रहेको छ ।

एलईभी–एक्सको इन्टेरियरमा पनि केही परिवर्तन गरिएको कम्पनीले जानकारी दियो । कम्पनीका अनुसार नयाँ अलह्वील ड्राइभ ईभीमा एसी भेन्ट र इन्टेरियर डिजाइन अपडेट भएको हो । सेग्मेन्टमै धेरै २१० एमएम अग्लो ग्राउन्ड क्लियरेन्स भएको एलईभी एक्समा अल ह्वील ड्राइभ फिचर थप भएको कारण अफरोडमा ढुक्कसँग चलाउन सकिने कम्पनीको भनाइ छ ।

नेक्सन भेन्चरले नाइमा अटो शोमा एलईभी एक्सको साथ अर्को नयाँ प्रिमियम ईभी एलईभी ०५ समेत लन्च गर्ने योजना बनाएको छ ।