अर्को इलेक्ट्रिक सम्भावना : नास्टले तयार गरेको इलेक्ट्रिक स्कुटर उपकुलपति श्रेष्ठद्वारा टेस्ट राइड

काठमाडौं – नेपाल विज्ञान तथा प्रविधि प्रज्ञा प्रतिष्ठान (नास्ट) ले इलेक्ट्रिक स्कुटरको प्रोटोटाइप तयार गरेको छ । लुम्बिनी प्रदेश सरकारसँगको सहकार्यमा नाष्टले यो इलेक्ट्रिक स्कुटर तयार पारेको बताइएको छ ।

लुम्बिनी प्रदेश सरकार र नास्ट मिलेर यस सम्बन्धी सम्भाव्यता अध्ययन गर्नुका साथै इलेक्ट्रिक स्कुटरको प्रोटोटाइप तयार गर्ने सम्झौता भए अनुसार हाल सो स्कुटर तयार भएको हो ।

लुम्बिनी प्रदेशको आर्थिक सहयोगमा अघि बढेको यो परियोजना अन्तर्गत स्कुटर निर्माण तथा अध्ययनको काम सम्पन्न भएको नास्टका प्रविधि संकाय प्रमुख रविन्द्र ढकालले बताएका छन् । नास्टका टेक्निकल लिड प्रल्हाद गुप्ताको नेतृत्वमा अघि बढेको यो परियोजनाको सम्पूर्ण काम सम्पन्न भएको छ ।

स्कुटर निर्माणको काम सम्पन्न भएसँगै आइतबार नास्टका उपकुलपति सुनिलबाबु श्रेष्ठ सहितको टोलीले उक्त स्कुटरको टेस्ट राइड गरेको छ ।

यस सम्बन्धी प्रतिवेदन आगामी केही दिनमा सार्वजनिक गरिने बताइएको छ । नास्टले बजारमा तीन लाखभित्रै इलेक्ट्रिक स्कुटर ल्याउन सकिने उल्लेख गरेको समेत बताइएको छ ।